Այսօր Կառավարության նիստի ավարտից հետո սպասվում էր Առողջապահության նախարար Արսեն Թորոսյանի ասուլիսը:
Որպես արդեն ավանդույթ՝ լրագրողները ասուլիսի ժամանակ իրենց հարցերը կարող են ուղղել առցանց՝ հարցերն ուղարկելով Հայկական միասնական տեղեկատվական կենտրոնի ֆեյսբուքյան էջին:
AntiFake.am-ի լրագրողը, ունենալով բազմաթիվ հարցեր, նամակ է ուղարկել Տեղեկատվական կենտրոնի ֆեյսբուքյան էջին: Արդեն իսկ ծանոթ լինելով հարթակի չհամակարգված աշխատանքին և ունենալով AntiFake.am-ի՝ նախկինում ուղարկած հարցերը չբարձրաձայնելու պրակտիկան՝ հարցերը տեղադրվել են նաև պաշտոնական էջի ասուլիսի ուղիղ հեռարձակման մեկնաբանություններում, ասուլիսի հայտարարության մասին գրառման մեկնաբանություններում և անձնական նամակով ուղարկվել է նաև Առողջապահության նախարարի մամուլի խոսնակ Ալինա Նիկողոսյանին։
Նշենք, որ հարցերը պաշտոնական հարթակին ուղարկվելուց անմիջապես հետո նկատել են, սակայն, ինչպես նախկինում, այս անգամ ևս մամուլի խոսնակը չի չհնչեցրել դրանք:
Ստորև ներկայացնում ենք Առողջապահության նախարարին ուղղված AntiFake.am-ի հարցերը.
1. Պարետի վերջին որոշումներից մեկի հավելվածում հիվանդության զարգացման ծանր ռիսկի խմբում որպես 4-րդ խումբ ներառված են մանկահասակ երեխաներն ու նորածինները: Մինչդեռ նախկինում պարբերաբար ասել եք, որ երեխաները ռիսկային խմբում չեն: Ինչո՞վ է պայմանավորված այս փոփոխությունը: Քանի՞ վարակված մանկահասակ երեխա կա Հայաստանում: Արդյո՞ք դպրոցահասակ երեխաները, որոնք վարակվել են, նույնպես այս խմբում են: Ինչպե՞ս է 2 ամսական երեխա ունեցող ծնողի և երեխայի վիճակը:
2. Վարակված 30 անձանց տեղակայումը հայտնի չէր: Արդյո՞ք հաջողվել է բացահայտել նրանց տեղակայումը կամ քանիսինն է հաջողվել պարզել:
3. Քանի՞ քաղաքացի է Չարենցավանում վարակվել կորոնավիրուսով:
4.Նախադրյալներ կա՞ն արտակարգ դրության ռեժիմը երկարաձգելու համար՝ դեպքերի ավելացման ֆոնին։
5. Դեպքերի ավելացմամբ պայմանավորված՝ փոխվե՞լ է արդյոք մարդկանց թեստավորման սկզբունքը։
6. Լրագրողների հետ ճեպազրույցներից մեկում ասել եք, որ կորոնավիրուսը շատ լուրջ հիվանդություն չէ և շատ հատուկ միջոցներ ձեռնարկելու անհրաժեշտություն չկա: Արդյո՞ք հիմա էլ եք այդպես կարծում։
Մամուլիսի ասուլիսի ավարտից հետո լրագրողը հաղորդագրություն է ուղարկել պաշտոնական հարթակին՝ խնդրելով հաջորդ ասուլիսի ժամանակ լրագրողների հարցերը սկսել AntiFake.am-ի ուղարկած հարցերից, որպեսզի տպավորություն չստեղծվի, որ հարցերը ընտրվում են խտրականորեն։