AntiFake.am-ը հարցում էր ուղարկել Տավուշի մարզպետարան` խնդրելով տրամադրել 2019 թվականի ընթացքում կառույցում տրամադրված պարգևավճարների չափը, ինչպես նաև` մարզպետի, մարզպետի տեղակալների և օգնականների ստացած պարգևատրումները` առանձին:
AntiFake.am-ի հարցմանն ի պատասխան մեզ հայտնեցին, որ 2019 թվականի ընթացքում ՀՀ Տավուշի մարզպետարանում 106 աշխատակիցներ 7 անգամ ստացել են 103.452.400 դրամի չափով պարգևատրում (ներառյալ քաղաքացիական ծառայողներին տրամադրվող 25.412.500 դրամ պարգևատրման գումարը:)
Չնայած այն հանգամանքին, որ մեր հարցմամբ խնդրել էինք տրամադրել նաև անձամբ մարզպետի, մազրպետի տեղակալների և օգնականների ստացած պարգևավճարների չափը, մեզ նման տեղեկատվություն չի տրամադրվել: Տավուշի մարզպետարանը, ի թիվս այլ գերատեսչությունների, դարձյալ հղում է կատարել անձնական տվյալների գաղտնիությանը` մեջբերելով ՀՀ աշխատանքային օրենսգրքի 134-րդ հոդվածի 1-ին կետը:
2019թ. հունիսի 10-ին hetq.am կայքը հոդված էր հրապարակել` անդրադառնալով Տավուշի մարզում աշխատակիցներին տրված պարգևավճարներին: Ըստ որի մարզպետարանի 101 աշխատակիցներ ստացել են եռամսյակային պարգևավճար: Պարգևավճար չստացած աշխատակիցներ չկան: Եռամսյակի կտրվածքով Տավուշի մարզպետարանի պարգևատրման ընդհանուր գումարը կազմել է 16 մլն 274 հազար դրամ:
Մարզպետ Հայկ Չոբանյանը, մազրպետարանի գլխավոր քարտուղարը, վերջինիս տեղակալը, երեք վարչության պետեր պարգևատրվել են իրենց աշխատավարձի 71%-ի չափով, իսկ մյուսներն՝ ավելի քիչ:
Հոդվածի ռուսերեն տարբերակը: