Մարտի 12-ին ՌԴ ԱԳՆ-ն հաղորդագրություն է տարածել, որում ասվում է, որ պատճառ ընդունելով Լեռնային Ղարաբաղի հակամարտության կարգավորված չլինելը՝ Ադրբեջանի սահմանային ծառայությունը շարունակում է հրաժարվել իր երկրի տարածք թողնել այն անձանց (անկախ քաղաքացիությունից), որոնք ազգությամբ հայ լինելու ուղղակի կամ անուղղակի նշաններ ունեն: Դա պատճառաբանվում է նրանով, որ անհնար կլինի ապահովել այդ անձանց անվտանգությունը: Ռուսական կողմի բազմաթիվ ուղերձներն ադրբեջանական կողմին առ այն, որ անթույլատրելի է ազգային հիմքի վրա խտրական գործողությունները Ադրբեջանի Հանրապետություն ժամանող ՌԴ քաղաքացիների նկատմամբ, արհամարհվում են:
Հաշվի առնելով ստեղծված հանգամանքները՝ ՌԴ ԱԳՆ-ն խորհուրդ է տալիս Ռուսաստանի քաղաքացիներին Ադրբեջան այց ծրագրելիս մանրակրկիտ ծանրութեթև անել հնարավոր ռիսկերը: