Արցախյան 3 պատերազմների մասնակից Արարատ Աղաբեկյանին ոստիկանները լուսադեմին անհայտ ուղղությամբ էին տարել: Ազատամարտիկը, որը հասարակության շրջանում հայտնի դարձավ, երբ Շուռնուխում այրեց իր տունը թշնամուն չհանձնելու համար, Շուռնուխի գյուղապետ Հակոբ Արշակյանի եղբայրն է:
Հակոբ Արշակյանից հետաքրքրվեցինք՝ ինչու են բերման ենթարկել առողջական խնդիրներ ունեցող Արարատին, որը Շուռնուխում հայտնի է որպես Աշխարհապետ: Արշակյանը մեզ ասաց, որ այս պահի դրությամբ իրեն ոչինչ հայտնի չէ, միայն գիտի, որ եղբորը բերման են ենթարկել առանց որևէ հիմք ներկայացնելու:
Խոսելով այլ շուռնուխցիների բերման ենթարկելու մասին՝ Արշակյանը հստակ թվեր չնշեց, սական փաստեց, որ այդպիսիք կան: Իր ունեցած վերջին տեղեկությունների համաձայն էլ` 8-9 հոգու միայն Գորիսից են բերման ենթարկել:
Հարցին, թե իրավապահներն իր հետ կապված գործողություններ ձեռնարկել են, թե ոչ` Շուռնուխի համայնքապետն ասաց՝ «դեռ ոչ»:
Հիշեցնենք, որ համացանցում տարածված տեսանյութում երևում է, թե ինչպես է առողջական խնդիրներ ունեցող Արարատ Աղաբեկյանի նկատմամբ անհամաչափ ուժ կիրառվում և նրան ծնկաչոք բերման ենթարկում Քննչական կոմիտե:
Հեղինակ՝ Մարի Ամիրջանյան
Աղբյուր՝ AntiFake.am