Այսօր ՀՀ վարչապետ Նիկոլ Փաշինյանը հեռախոսազրույց է ունեցել ՌԴ նախագահ Վլադիմիր Պուտինի հետ:
Հեռախոսազրույցի կապակցությամբ տարածվել է պաշտոնական հաղորդագրություն: Այս առիթով մամուլի հաղորդագրություն է հրապարակել նաև ՌԴ նախագահի մամուլի ծառայությունը:
Ըստ ՀՀ վարչապետի աշխատակազմի հաղորդագրության` կողմերը «քննարկել են նոյեմբերի 9-ի եռակողմ հայտարարության կետերի իրականացման ընթացքը, մասնավորապես՝ կարևորելով 8-րդ կետի լիարժեք կյանքի կոչման անհրաժեշտությունը, որը վերաբերում է ռազմագերիների, պատանդների և պահվող այլ անձանց փոխանակմանը: Երկու երկրների ղեկավարներն անդրադարձ են կատարել նաև անվտանգության և էներգետիկայի ոլորտներում համագործակցությանն ու ընթացիկ ծրագրերին, տարածաշրջանային խնդիրներին»:
Ռուսական հաղորդագրությամբ` հեռախոսազրույցը կայացել է հայկական կողմի նախաձեռնությամբ: Քննարկվել է Լեռնային Ղարաբաղի շուրջ ստեղծված իրավիճակը: «Բավականությամբ նշվել է, որ ռուս խաղաղապահների ջանքերի շնորհիվ տարածաշրջանում իրավիճակը շարունակում է մնակ կայուն և հանգիստ: Մտքեր են փոխանակվել նաև երկկողմ համագործակցության ընթացիկ թեմաների, այդ թվում` էներգետիկ ոլորտի վերաբերյալ: Նիկոլ Փաշինյանը տեղեկացրել է Հայաստանում ներքաղաքական իրավիճակի զարգացումների վերաբերյալ` կապված հունիսին նշանակված արտահերթ խորհրդարանական ընտրությունների հետ»,- ասված է հաղորդագրության մեջ:
Ստացվում է, որ պետության ղեկավարները քննարկել են նաև Հայաստանի ներքաղաքական իրավիճակը, որի մասին հատվածը բացակայում է հայերեն հաղորդագրության մեջ: Իսկ ռուսական հաղորդագրության մեջ էլ բացակայում է այն հատվածը, որ Փաշինյանն ու Պուտինը քննարկել են ռազմագերի, պատանդների և պահվող այլ անձանց փոխանակման հարցը: Ավելին, ըստ ռուսական հաղորդագրության` նոյեմբերի 9-ի հայտարարության մասին խոսակցություն չի եղել:
Արդյունքում` Նիկոլ Փաշինյանի և Վլադիմիր Պուտինի հերթական հեռախոսազրույցի հիմնական թեմաները եղել են երկկողմ հարաբերությունների և Հայաստանի ներքաղաքական իրավիճակի մասին, ինչի մասին հայկական կողմը լռում է:
Աղբյուր՝ AntiFake.am