Ապրիլի 25-ին Նիկոլ Փաշինյանը հրաժարական ներկայացրեց՝ տեղեկացնելով, որ մինչ արտահերթ խորհրդարանական ընտրությունների անցկացումը շարունակելու է կատարել ՀՀ վարչապետի պարտականությունները:
Արդյո՞ք դա չի հակասում ՀՀ Սահմանադրությանը: Այս հարցին պատասխանել է ինքը՝ Փաշինյանը: Մասնավորապես, 2018թ. իշխանափոխության ընթացքում Փաշինյանը հայտարարում էր, թե Սերժ Սարգսյանի հրաժարականը նշանակում է Կառավարության ողջ կազմի հրաժարական:
«Այսօր Կառավարությունում չկա ոչ մի գործող պաշտոնյա: Կառավարության բոլոր անդամները հրաժարական տված են և ՀՀ-ում այս պահին չկա Կառավարություն»,- ասում էր նա:
Փաստացի, ըստ Փաշինյանի նախկինում արված հայտարարությունների՝ իր հրաժարականը ենթադրում է Կառավարության ողջ կազմի հրաժարական և այս պահին ՀՀ-ում Կառավարություն չկա:
Բացի այդ, նա խոսում էր այն մասին, որ ՀՀ օրենսդրությունը ենթադրում է, որ վարչապետի հրաժարականի պարագայում չի կարող լինել վարչապետի ժամանակավոր պաշտոնակատար:
Իրավական գնահատականը, թե արդյոք Փաշինյանի՝ վարչապետի ժամանակավոր պաշտոնակատար լինելը հակասում է ՀՀ Սահմանադրությանը, լավագույնս կարող են տալ սահմանադրագետներն ու իրավաբանները. մենք պարզապես արձանագրում ենք փաստերը:
Փաշինյանի հակասական հայտարարությունները ներկայացնող տեսանյութը՝ ստորև.
Հեղինակ՝ Մարի Ամիրջանյան
Աղբյուր` AntiFake.am