Այսօր առավոտից հակասական տեղեկություններ են շրջանառվում Սյունիքում և Գեղարքունիքում Ադրբեջանի կողմից հրահրված սադրանքների վերաբերյալ:
Իշխանական պաշտոնյաները և նրանց արբանյակները շտապեցին հերքել նման տեղեկությունները և այն որոշ շրջանակների, քաղաքական գործիչների և լրատվականների կողմից իրականացվող «մեդիատեռոր» անվանել: Սակայն այն, որ ադրբեջանական զորքերը առաջ են եկել և ձգտում են հաստատվել նոր բնագծերում, նրանք չհերքեցին:
Օրվա երկրորդ կեսին հայտնի դարձավ, որ ԱԳ նախարարի պաշտոնակատար Արա Այվազյանը հեռախոսազրույց է ունեցել ՌԴ ԱԳ նախարար Սերգեյ Լավրովի հետ: Քննարկվել են այսօր Սյունիքում տեղի ունեցած իրադարձությունները:
«Նախարարի պաշտոնակատար Այվազյանն իր գործընկերոջը տեղեկացրեց Հայաստանի պետական սահմանին տեղի ունեցած վերջին միջադեպի մասին և նշեց ադրբեջանական կողմից նման սադրանքների հրահրման անթույլատրելիությունը: Երկուստեք կարևորվեց տարածաշրջանային անվտանգության և կայունության շուրջ ձեռքբերված պայմանավորվածությունների լիարժեք կատարումը և իրադրության սրումը կանխարգելող քայլերի համադրումը»,- նշվում է ԱԳՆ տարածած մամուլի հաղորդագրության մեջ:
Այստեղ հետաքրքիր հանգամանք է, որ մինչ իմքայլականները միմյանց հերթ չտալով փորձում էին հավաստիացնել, որ Սյունիքում իրավիճակը վերահսկելի է և խնդրով զբաղվում են սահմանապահներն ու ՌԴ խաղաղապահները, Արա Այվազյանը թեմայի շուրջ, անշուշտ հրատապ, հեռախոսազրույց է ունենում Սերգեյ Լավրովի հետ:
Հայկական արտաքին գերատեսչությանը հետևեց նաև ՌԴ ԱԳՆ մամուլի հաղորդագրությունը, որի մեջ նշվում է. «Զրույցի ընթացքում ռուսական կողմը վերահաստատել է կրակի դադարեցման ռեժիմին խստորեն հետևելու անհրաժեշտությունը, ինչպես նաև 2020թ. նոյեմբերի 9-ի և 2021թ. հունվարի 11-ի Ռուսաստանի, Հայաստանի և Ադրբեջանի ղեկավարների հայտարարությունների մյուս կետերի խստորեն կատարումը»: