«Քաղաքացիական գիտակցություն» ազատական ՀԿ նախագահ, AntiFake.am կայքի հիմնադիր Նարեկ Սամսոնյանը ֆեյսբուքյան ուղիղ եթերում անդրադարձել է Նիկոլ Փաշինյանի քարոզչական ունակություններին, ուղղություններին, զուգահեռներին ու բնույթին, ինչպես նաև հիմնական քարոզչական թեզերին՝ ներքին թշնամիներ, չհիմնավորված մեղադրանքներ, «օդում կախված լուրեր»։
Անդրադառնալով Նիկոլ Փաշինյանի և նրա թիմի կողմից իրականացվող քաղաքականությանը` Սամսոնյանը ասաց․ «Նիկոլ Փաշինյանի կողմից քարոզչական ուղղությունները չեն փոփոխվել երբեք` սկսած 1990-ականներից, երբ Փաշինյանը մտել է քաղաքական ասպարեզ»։
Սամսոնյանը նշեց, որ Նիկոլ Փաշինյանի ողջ գործունեության ընթացքում քաղաքական քարոզչության ձևը «ներքին թշնամիների» ձևավորումն է եղել, որով մեղադրանքներ էին ներկայացվում քաղաքական հակառակորդների հասցեին։ Նա նաև հավելեց, որ Նիկոլ Փաշինյանն է շրջանառության մեջ դրել «ըստ օդում կախված լուրերի» տերմինը, որը քարոզչության մի մասն էր կազմում։
«Ողջ խնդիրը ինչու՞մ է կայանում. ժողովրդին համոզել, ստեղծել «հակակերպարներ», որոնց հիման վրա շարունակել սեփական գործունեությունը»,- մանրամասնեց Սամսոնյանը` ավելացնելով, որ իշխանությունները ոչինչ չեն արել այս թեզերը չեզոքացնելու համար։
«Իշխանության անգործությունը բերեց այս թեզերի համար իրական քաղաքական միջավայր ստեղծելուն, որով այս թեզերը սկսեցին զարգանալ»,- ասաց Սամսոնյանը։
Սամսոնյանը պարզաբանեց, որ Նիկոլ Փաշինյանը քաղաքական քարոզչական թեզերը շարունակում է օգտագործել արդեն իշխանական դիրքերից։
«Ժողովուրդը` այդ միֆերից հոգնած, ըստ էության, ակտիվ փոքրամասնությունը դուրս եկավ փողոց, շանտաժի միջոցով Փաշինյանը վերցրեց իշխանությունը՝ այդ ստի ու կեղծիքի թեզերի տակ, որոնք ոչ մի կերպ չեն հիմնավորվել և հիմա այդ «ներքին թշնամիներ» ստեղծելու գործընթացները նրա համար ավելի հեշտ է քան այն ժամանակ», -հավելեց նա։
«Նիկոլ Փաշինյանը որոշեց, որ ՀՀ-ի ողջ խնդիրների միակ և գլխավոր պատասխանատուն ՍԴ-ի նախագահ Հրայր Թովմասյանն է։ Հիմա վերջնական փուլին են հասել՝ այսպես ասած այդ «թշնամու» հարցը լուծելուն»,- ասաց նա։
Անդրադառնալով հասարակության սևերի և սպիտակների բաժանելուն` Սամսոնյանը ասաց․ «Սև-սպիտակի տրամաբանությունը նորից նույն էր՝ փրկիչ-թշնամի, լավ-վատ, գիշեր-ցերեկ, այսինքն՝ այդ միֆերը, որոնք կային իրականում, դրանք ներքին թշնամու տրամաբանությունից էին բխում։ Սա նշանակում է` քաղաքական դաշտի տոտալ միաբևեռացում»։
Սամսոնյանը նշեց, որ Նիկոլ Փաշինյանին անհրաժեշտ է բոլոր ընդդիմադիրների քաղաքական ոչնչացումը, ինչը արվում է նրանց «ներքին թշնամի» դարձնելով։
«Այսօր Հայաստանում քաղաքական ընդդիմախոսների վրա սարքվում են գործեր, քաղաքական ընդդիմախոսները հետապնդվում են։ Հայաստանում օլիգարխները դարձել են խոշոր սեփականատերեր, եթե փող են տվել Նիկոլ Փաշինյանին»,- ասաց Սամսոնյանը։
Սամսոնյանը հավելեց նաև, որ այժմ ներքին պառակտման փորձ է արվում։ Նա նշեց, որ քարոզչական մեթոդներից մեկը ֆեյքերի ինստիտուտն է, որով նախկինների հանդեպ թշնամանք են ավելացնում։
Սամսոնյանը, անդրադառնալով իր դեմ իրականացվող տեղեկատվական արշավին, որն իրականացվում է ֆեյք էջերի և յութուբյան ալիքների միջոցով, ասաց․ «Պատճառը մեկն է. ես դուրս եմ եկել այդ ստի և կեղծիքի տրամաբանությունից»։
Հրապարակման ռուսերեն տարբերակը:
Մանրամասները՝ տեսանյութում