Փետրվարի 23-ին Հայկ Ստվերը Նիկոլ Փաշինյանի հեղինակած բանաստեղծության հիման վրա ներկայացրել էր Սահմանադրական փոփոխությունների հանրաքվեի «Այո»-ի շտաբի՝ «Ասում եմ ԱՅՈ» վերնագրով երգը: Այն միանշանակ չէր ընդունվել հասարակության կողմից և մեծամասամբ արժանացել էր բացասական կարծիքների և հումորային մեկնաբանությունների տեղիք տվել:
Այսօր համացանցում բուռն կերպով և հումորային մեկնաբանություններով քննարկվում է այն փաստը, որ 100 հազարից ավելի դիտում ունեցող տեսահոլովակի «լայքերի» ու «դիսլայքերի» մեկնաբանությունները անջատվել են, և ինչպես նշում են ֆեյսբուքյան և յութուբյան օգտատերերը, դա արվել է «դիսլայքերի» առատությունը քողարկելու նպատակով: Ինչպես ցույց են տալիս յութուբյան մեկնաբանությունները, երգի լայքերի տեսանելիությունը անջատվել է մոտ 10 ժամ առաջ:
Հիշեցնենք, որ Հայկ Ստվերը ՀՀ ԱԺ պատգամավոր Մխիթար Հայրապետյանի եղբայրն է և հասարակությանը հայտնի դարձավ «Իմ քայլը» շարժման երգի կատարումից հետո:
Հեղինակ՝ Մարի Ամիրջանյան