Հայաստանի եւ Ադրբեջանի ԱԳՆ-երի եւ ԵԱՀԿ Մինսկի խմբի համանախագահների համատեղ հայտարարությունը
Վիեննա, 29 մարտի 2019թ.
Ադրբեջանի Հանրապետության նախագահ Իլհամ Ալիևը և Հայաստանի Հանրապետության վարչապետ Նիկոլ Փաշինյանը այսօր ԵԱՀԿ Մինսկի խմբի համանախագահների (Իգոր Պոպով, ՌԴ, Ստեֆան Վիսկոնտի, Ֆրանսիա, Էնդրյու Շոֆեր, ԱՄՆ) հովանու ներքո առաջին անգամ հանդիպել են Վիեննայում: Հանդիպմանը մասնակցել են նաև արտգործնախարարներ Զոհրաբ Մնացականյանը և Էլմար Մամեդյարովը: Հանդիպմանը մասնակցել է նաև ԵԱՀԿ գործող նախագահի անձնական ներկայացուցիչ Անջեյ Կասպրշիկը:
Հանդիպումը տեղի է ունեցել դրական և կառուցողական մթնոլորտում և հնարավորություն է տվել երկու առաջնորդներին հստակեցնել իրենց համապատասխան դիրքորոշումները: Նրանք մտքեր են փոխանակել կարգավորման գործընթացի մի քանի առանցքային հարցերի եւ բովանդակության գաղափարների շուրջ:
Երկու առաջնորդները ընդգծել են խաղաղությանը նպաստող միջավայրի կերտման և հետագա հստակ և նշանակալի քայլերի ձեռնարկման կարևորությունը բանակցային գործընթացում հակամարտությանը խաղաղ լուծում գտնելու համար:
Հիշելով Դուշանբեում իրենց խոսակցությունը՝ առաջնորդները վերստին հաստատել են հրադադարի ամրապնդման և ուղիղ հաղորդակցության մեխանիզմի բարելավման իրենց պատրաստակամությունը: Նրանք նաև համաձայնվել են զարգացնել մի շարք միջոցառումներ հումանիտար ոլորտում:
Վարչապետը և նախագահը հանձնարարել են իրենց արտգործնախարարներին մոտ ապագայում հանդիպել համանախագահների հետ: Նրանք նաև համաձայնվել են շարունակել ուղիղ երկխոսությունը: