Հայաստանի Հանրապետությունը արդեն 7 օր է՝ գտնվում է արտակարգ դրության մեջ՝ իր բոլոր արտակարգ հանգամանքներով: AntiFake.am-ը շարունակում է իր բնականոն գործունեությունը և իր ընթերցողներին ամփոփ ներկայացնում մարտի 22-ի իրադարձությունները:
Արդեն Հայաստանի Հանրապետությունում հաստատված է նոր տիպի կորոնավիրուսով վարակման 194 դեպք: Այդ մասին ֆեյսբուքյան ուղիղ եթերի ժամանակ հայտարարել է ՀՀ վարչապետ Նիկոլ Փաշինյանը:
«Հաստատված դեպքերի 78 տոկոսը ընդհանրապես ջերմություն չունի: 70-ից բարձր տարիքային խմբից ունենք 3 հոգի հիվանդ, իսկ 80-ից բարձր հիվանդ չունենք, սա նշանակում է՝ ռիսկային գոտում հիվանդ չունենք», - ասել է վարչապետը։
Նա նաև նշեց. «Մեծագույն խնդիրը ոչ այնքան կորոնավիրուսի տարածումը կանխելն է, որքան ապահովելը, որ դրա հետևաքով չունենանք մահեր կամ ունենանք նվազագույն մահեր»:
Ավելի վաղ նշվում էր 190 դեպքի մասին, որից 157-ը փոխկապակցված է եղել երկու առաջնակի դեպքերի օջախների հետ:
Անդրադառնալով արտակարգ իրավիճակում տնտեսկան ոլորտում նախատեսվող քայլերին՝ վարչապետը ասել է. «Կայացրել ենք մի շարք կարևոր որոշումներ: Ըստ էության՝ որոշել ենք լայն աջակցություն ցուցաբերել տնտեսվարողներին և տնտեսությանը, բայց դա պետք է ուղղված լինի տնտեսվարողների միջոցով մարդուն և մարդկանց: Պատրաստում ենք փաթեթ, որպեսզի արտոնյալ վարկեր տրամադրենք աջակցության կարիք ունեցող ընկերություններին»:
Ավելի վաղ կորոնավիրուսով վարակվածների առողջական վիճակի մասին ֆեյսբուքյան ուղիղ եթերում մանրամասներ է հայտնել նաև ԱՆ Արսեն Թորոսյանը:
«Այս պահին 190 պացիենտներից 14-ը թոքաբորբ ունեն, նրանցից 6-ն ունի ինտենսիվ թերապիայի կարիք, քանի որ ունեն հարակից ուղեկցող հիվանդություններ»։
Արտակարգ դրության պայմաններում վրաց-հայկական անցակետերից կաշխատի միայն Սադախլոյի անցակետը, որը հնարավորություն կունենան հատել միայն իրենց հայրենիք վերադարձող ՀՀ և Վրաստանի քաղաքացիները։ Այդ մասին տեղեկացնում է Հայկական միասնական տեղեկատվական կենտրոնը:
«Վրաստանի վարչապետի գլխավորությամբ գործող միջգերատեսչական կազմակերպչական խորհուրդը այսօր որոշում է կայացրել, որ քաղաքացիների համար (խոսքը չի վերաբերում բեռնափոխադրումներին) վրաց-հայկական անցակետերից կաշխատի միայն Սադախլոյի անցակետը, որը հնարավորություն կունենան հատել միայն իրենց հայրենիք վերադարձողՀՀ և Վրաստանի քաղաքացիները։
Տեղեկացնենք նաև, որ Սադախլոյի անցակետը հնարավոր է հատել միայն ժամը 10:00-18:00-ն ընկած ժամանակահատվածում:
Հավելենք, որ բեռնափոխադրումների համար հայ-վրացական բոլոր անցակետերը գործում են առանց սահմանափակումների»:
Հիշեցնենք, որ արտակարգ դրության պայմաններում գործում է պարետատան թեժ գիծը:
Թեժ գծի համարներն են.
8141 - Հայաստանի տարածքից զանգ կատարելիս
+374 11208141 - արտերկրից զանգ կատարելիս
060 83 83 00 - առողջապահական հարցերի դեպքում
Հայաստանի տարածքում զանգերն անվճար են: