Հայաստանի Հանրապետությունը, արդեն 16 օր է՝ գտնվում է արտակարգ դրության մեջ՝ իր բոլոր արտակարգ հանգամանքներով: AntiFake.am-ը շարունակում է իր բնականոն գործունեությունը և ամփոփ իր ընթերցողներին է ներկայացնում մարտի 31-ի իրադարձությունները:
Հայաստանում կորոնավիրուսով վարակակիրների թիվը հասել է 532-ի: Բուժվածների թիվը 31 է, մահվան ելքերը՝ 3: Այս մասին տեղեկացրել է Հիվանդությունների վերահսկման և կանխարգելման ազգային կենտրոնը:
Մարտի 30-ի դրությամբ հաստատվել է կորոնավիրուսային հիվանդության 50 նոր դեպք: Նրանցից 23-ը գտնվել է կարանտինում, 24-ը հաստատված դեպքի կոնտակտավոր է: 3 դեպքի շփման շրջանակը պարզվում է:
Առողջապահության նախարար Արսեն Թորոսյանը ֆեյսբուքյան իր էջում տեղեկացրել է ևս մեկ առողջացած պացիենտի մասին:
«Ունենք ևս մեկ առողջացած պացիենտ: Առողջացածների թիվը դարձավ 31:
Նաև մեկուսացումից դուրս են եկել 150 հոգի, որից 65-ը Իտալիայից հատուկ չվերթով ժամանած մեր քաղաքացիներն են:
Առողջություն եմ մաղթում բոլորին»:
Առողջապահության նախարարությունը ներկայացրել է կորոնավիրուսային հիվանդության հաստատված դեպքերն` ըստ Երևանի և մարզերի:
«Ներկայացնում ենք Հայաստանում կորոնավիրուսային հիվանդության հաստատված դեպքերն ըստ Երևանի և մարզերի: Պետք է նշել, որ 532 դեպքից այս պահին ճշգրիտ է 502 քաղաքացու բնակության վայրը:
Մնացած 30 պացիենտի բնակության վայրը պարզվում է, քանի որ վերջիններիս փաստացի և անձնագրում հաշվառված տվյալների մեջ կա անհամապատասխանություն:
Հավելենք, որ նշված վիճակագրությունը չի կապվում համաճարակաբանական գործողությունների հետ, և հաստատված յուրաքանչյուր դեպք ուսումնասիրվել է մասնագետների կողմից: Տվյալները լիովին հստակեցնելուց հետո կհրապարակվի նաև քարտեզը։
Երևան` 219
Արագածոտն` 10
Արարատ` 113
Արմավիր` 51
Լոռի` 4
Կոտայք` 88
Շիրակ` 6
Սյունիք` 8
Վայոց ձոր` 1
Տավուշ` 2»:
«Ստիպված ենք առնվազն 10 օրով երկարացնել խստացված սահմանափակումները»: Այս մասին ֆեսբուքյան ուղիղ եթերում հայտարարել է վարչապետ Նիկոլ Փաշինյանը:
«Ես խնդրում եմ բոլորիս շատ լուրջ վերաբերել: Մեր այսօրվա դրական ախտորոշված քաղաքացիների մեծ մասը 424 անձ, նույնիսկ ջերմություն չունի, բայց մյուս կողմից շուրջ 90 անձ թոքաբորբ ունի և այս պահին նրանցից 30-ը գտնվում են ծանր վիճակում են: Իրականում իրավիճակը շատ ռիսկային է»,- ասել է Փաշինյանը:
«Հետագա տասը օրերի ընթացքում կարող է մարտավարությունը փոխվել և սահմանափակումները ավելի են խստացվելու, վերահսկողությունը պետք է ավելի էֆեկտիվ դարձնել, ոստիկանության ուժերին նաև միացնելու ենք այլ կառույցներից տարբեր ուժեր, որովհետև իրապես ծանր աշխատանք է այս վերահսկողությունը և որպեսզի բարձրացնենք վերահսկողությունը մենք հավելյալ ուժեր ենք ներգրավելու»: Այս մասին Կառավարության մամուլի կեենտրոնում տեղի ունեցած ասուլիսիժամանակ հայտարարել է ՀՀ փոխվարչապետ, Պարետ Տիգրան Ավինյանը:
«Մենք կարող է որոշ չափով փոփոխենք այն մեխանիզմները, որով անձինք իրավունք են ստանում տեղաշարժվելու ՀՀ տարածքով և մասնավորապես աշխատանքի մեկնող անձինք մոտ երկու օրից պետք է ոնենան մի փաստաթուղթ, որը վկայում է այն մասին, որ իրենք պետք է գնան այսինչ տեղն աշխատանքի: Դա պետք է տրվի համապատասխան տնտեսվարողի կամ համապատասխան պետական հանրային մարմնի կողմից, որ այս անձը այստեղ է աշխատում և պետք է ներկայանա աշխատանքի»,- ներկայացրել է Ավինյանը:
Կազմակերպվել է Հնդկաստանում գործող Կալկաթայի Հայոց Մարդասիրական ճեմարանի 68 սաների և նրանց ուսուցիչների Հայաստան փոխադրումը: Այդ մասին Ֆեյսբուքյան իր էջում տեղեկացրել է ՀՀ փոխվարչապետ, Պարետ Տիգրան Ավինյանը:
«Մարտի 31-ին Մայր Աթոռ Սուրբ Էջմիածնի նախաձեռնությամբ և ֆինանսավորմամբ, ՀՀ պարետատան և ԱԳՆ համակարգմամբ, կազմակերպվեց հատուկ չվերթ՝ իրականացնելու Հնդկաստանում գործող Կալկաթայի Հայոց Մարդասիրական ճեմարանի 68 սաների և նրանց ուսուցիչների Հայաստան փոխադրումը:
Մայր Աթոռ Սուրբ Էջմիածնի հովանու ներքո Հնդկաստանում արդեն երկու հարյուրամյակ գործող Կալկաթայի Հայոց Մարդասիրական ճեմարանը հանրակրթական դպրոց է, ուր ուսանում են երեխաներ հիմնականում Հայաստանից, Իրանից, Սիրիայից, Իրաքից և այլ երկրներից»:
ՀՀ Պարետի որոշմամբ՝ վեց ժամով կասեցվել է Երեւանի եւ Եղեգնաձորի 5 տնտեսվարողի գործունեությունը։ Այդ մասին տեղեկացրել է Հայկական տեղեկատվական միասնական կենտրոնը:
ՀՀ Պարետի որոշմամբ՝ վեց ժամով կասեցվել է Երեւանի եւ Եղեգնաձորի 5 տնտեսվարողի գործունեությունը։
«Հաստատած ուղեցույցի դրույթները խախտելու պատճառով գործունեության ժամանակավոր կասեցման որոշում կիրառվել է արդեն շուրջ 2 տասնյակ տնտեսվարողի հանդեպ։ Ակտիվ մշտադիտարկումը շարունակվում է»։