Կառավարության մամուլի կենտրոնում հրավիրված մամուլի ասուլիսի ժամանակ Առողջապահության նախարար Արսեն Թորոսյանը պատասխանում էր լրագրողների հարցերին:
AntiFake.am-ը հետաքրքիր էր այն հանգամանքը, թե պարետի վերջին որոշումներից մեկի հավելվածում հիվանդության զարգացման ծանր ռիսկի խմբում որպես 4-րդ խումբ ներառված են մանկահասակ երեխաներն ու նորածինները: Մինչդեռ նախկինում պարբերաբար հայտնել է, որ երեխաները ռիսկային խմբում չեն: Մեզ հետաքրքրում է, թե ինչով է պայմանավորված այս փոփոխությունը:
Արսեն Թորոսյանը մեր հարցին ի պատասխան ասել է.«Մանկահասակ երեխաների ռիսկի խմբում գտնվելը պայմանավորված է Առողջապահության համաշխարհային կազմակերպության ռեկոմենդացիաներով, և նրանց խորհուրդ տրվեց ավելի ուշադիր լինել, չնայած որ մենք երեխաների նկատմամբ միշտ ուշադիր ենք: Իսկ երբ ասել եմ, որ երեխաները զերծ են հիվանդության բարդացումներից, դա կրկին ուժի մեջ է, բայց դա չի նշանակում, որ մենք չպետք է զբաղվենք իրենց խնամքով և բուժումով : Խոսքը աշխարհում արձանագրված մահվան դեպքերին է վերաբերվում, որոնց մեջ բարեբախտաբար առողջ երեխաներ չկան: Իհարկե արձանագրվել է թույլ իմունիտետով երեխայի մահվան դեպք, օրինակ՝ Մեծ Բրիտանիայում, ինչը մեզ հավելյալ զգոնության առիթ է տալիս հատկապես քիմիոթերապիա ստացող, իմունային անբավարարություն ստացող երեխաների նկատմամբ»:
Իսկ այն հարցին, թե ինչպես է 2 ամսական երեխա ունեցող ծնողի և երեխայի վիճակը, որոնց մոտ կորոնավիրուսային վարակվածություն էր ախտորոշվել Թորոսյանը ենթադրեց, որ նրանց առողջական վիճակը լավ է, քանի որ վատ վիճակի մասին տեղեկություն չունի:
Թորոսյանը վարակված երեխաների ընդհանուր թվի վերաբերյալ տեղեկություններ չհայտնեց՝ նշելով, որ դա հիվանդության տարածման տեսանկյունից որևէ նշանակություն չունի:
Վարակված 30 անձանց տեղակայումը հայտնի չէր: Արդյո՞ք հաջողվել է բացահայտել նրանց տեղակայումը կամ քանիսինն է հաջողվել պարզել:
«Բոլորի տեղակայումը ի սկզբանե միշտ պարզված է եղել, որովհետև պացիենտները մեր հսկողության տակ են եղել: Եթե խոսքը նրանց բնակության մասին է, ապա կարևոր նշանակություն ունի համաճարակաբանական տեսանկյունից, հաճախ պարզվում է պոստֆակտում, երբ որ պացիենտի մոտ ախտորոշվում է հիվանդությունը և դա ամենօրյա գործընթաց է»,- պատասխանել է Թորոսյանը:
AntiFake.am-ը անդրադարձել էր աշխարհում երեխաների կորոնավիրուսային վարակվածության դեպքերին:
Արդեն իսկ գրանցվել են կորոնավիրուսով վարակված երեխաների մահվան դեպքեր Բելգիայում և Մեծ Բրիտանիայում, Պորտուգալիայում և Ֆրանսիայում: Վիրուսակիրների տարիքը չի գերազանցում 16 տարին: Բելգիայում մահացած 12-ամյա աղջիկը համարվում է կորոնավիրուսի պանդեմիայի ամենաերիտասարդ զոհը Եվրոպայում: Տվյալները ցույց են տալիս, որ վտանգի տակ են բոլոր տարիքային խմբերը:
Առավել երիտասարդ վիրուսակիրների վերաբերյալ տվյալներն այնքան էլ շատ չեն, բայց վերջին ուսումնասիրությունները ցույց են տալիս, որ նույնիսկ երեխաները առանձին դեպքերում ավելի խոցելի են, քան մյուս տարիքային խմբերը՝ կախված տարիքային և առողջական խնդիրներից: Չզարգացած իմունային համակարգ ունեցող նորածինները առավել խոցելի կարող են լինել կորոնավիրուսի նկատմամբ:
►Նախարարությունը առաջարկելու է կառավարությանը երկարացնել արտակարգ դրությունը. Արսեն Թորոսյան
►Փաշինյանը սխալ և մանիպուլյատիվ պնդումներ է արել կորոնավիրուսի մասին հարցերին ի պատասխան
►Փաշինյանը ավետում է բարի լուր՝ հակադրվելով Թորոսյանի՝ կորոնավիրուսի դեպքերի կրկնապատկման գուժին. հակասություններ կառավարության անդամների հայտարարություններում