Այսօր ՀՀ վարչապետ Նիկոլ Փաշինյանի ընտանիքին պատկանող «Հայկական Ժամանակ» լրատվականը հոդված էր հրապարակել, որտեղ մասնավորապես ասվում է. «Լավատեղյակ աղբյուրներից հայտնի դարձավ, որ վարչապետ Նիկոլ Փաշինյանի՝ ապրիլի 17-ի ուղիղ եթերով ուղերձի տեխնիկական կադրերի սկանդալային արտահոսքն իրականացվել է ՀՅԴ վերահսկողության տակ գտնվող «Երկիր մեդիա» հեռուստաընկերությունից:
Ըստ լրատվական դաշտում շրջանառվող լուրերի՝ «Երկիր մեդիա»-ի լրատվական հաղորդումների տնօրեն Գեղամ Մանուկյանը կադրերը փոխանցել է Ռոբերտ Քոչարյանին պատկանող «5-րդ ալիքի» տնօրեն Հարություն Հարությունյանին, որն էլ կազմակերպել է արտահոսքը Ռոբերտ Քոչարյանի աջակիցներին պատկանող ֆեյքերից մեկի միջոցով»:
Այս առնչությամբ կապվեցինք «Երկիր Մեդիա» հեռուստաընկերութան լրատվական հաղորդումների տնօրեն Գեղամ Մանուկյանի հետ: Մեզ հետ զրույցում պարոն Մանուկյանը ասաց. «Մի նախադասությամբ կասեմ՝ հիմարություն: Իրենց պատկերացրած լրագրությունը հենց սա է, որը կարելի է առանց որևէ բան ճշտելու՝ դատախազի կարգավիճակով հոդվածներ և լուրեր տպել»:
Իսկ «5TV» հեռուստաընկերության գործադիր տնօրեն Հարություն Հարությունյանը, մեկնաբանելով հրապարակումը, ասաց. «Հարցի հասցեատերը ես չեմ, ոչ էլ Գեղամ Մանուկյանը: Հասցեատերը իրենք են: Բայց երեկվա «ֆաս» հրահանգից հետո ամեն ինչ սպասելի է: Կարող է վաղը պարզվի, որ նաև դուք եք, կամ մեկ ուրիշն է»:
Այն հարցին, թե արդյո՞ք պատրաստվում է որևէ քայլեր ձեռնարկել այս հրապարակման դեմ, Հարություն Հարությունյանը ասաց. «Ես սովորություն չունեմ լրագրողների դեմ դատական հայցեր ներկայացնել: Ըստ երևույթին՝ կխորհրդակցեմ փաստաբանի հետ»:
Այսպիսով՝ կարող ենք փաստել, որ վարչապետի ընտանեկան լրատվամիջոցը հերթական կեղծ տեղեկությունն է տարածում լրատվամիջոցների և դրանց ղեկավարների վերաբերյալ՝ փորձելով առիթն օգտագործել վարչապետի քաղաքական հաշվեհարդարները ՀՅԴ-ի և ՀՀ երկրորդ նախագահ Ռոբերտ Քոչարյանի հետ օրակարգում պահելու համար՝ միաժամանակ վարկաբեկելով նրանց ու լրատվականներին։
Հեղինակ՝ Մելինե Հայրապետյան