AntiFake.am-ը շարունակում է հանրությանը ներկայացնել պետական ապարատի տարբեր կառույցներում հատկացվող ահռելի պարգևավճարների չափը։ Այս շարքով ներկայացնում ենք 2020 թվականի առաջին եռամսյակի ընթացքում պետական տարբեր կառույցներում հատկացված պարգևավճաների չափը։
AntiFake.am-ը հարցում էր ուղարկել Երևանի քաղաքապետարան՝ խնդրելով տրամադրել կառույցում 2020 թվականի առաջին եռամսյակի ընթացքում հատկացված պարգևատրումների ընդհանուր չափը։
Հարցմանն ի պատասխան՝ Երևանի քաղաքապետարանից տեղեկացրել են, որ 2020թ. առաջին եռամսյակի ընդհանուր չափը կազմում է 276.529.800 ՀՀ դրամ, որը համարժեք է ավելի քան 572.500 ԱՄՆ դոլարին։
Երևանի քաղաքապետարանից հայտնել են, որ ընդհանուր առմամբ պարգևատրվել է 1722 աշխատակից՝ միջինը 160.500 դրամ գումարի չափով (ներառյալ բոլոր հարկերը):
Նկատենք, որ պարգևատրման գումարների միջինացված տեսքով ներկայացնելը դուրս է տրամաբանությունից, քանի որ որոշ պաշտոնյաներ 2020 թվականի ընթացքում արդեն իսկ պարգևատրվել են մեկ և ավելի միլիոն դրամով։ Օրինակ՝ Երևանի քաղաքապետի տեղակալ Հայկ Սարգսյանը և քաղաքապետի խորհրդական Կարեն Համբարձումյանը խրախուսվել են դրամական պարգևատրմամբ 1 միլիոն 800 հազարական դրամի չափով՝ Երևան քաղաքի 2020թ. բյուջեով նախատեսված պարգևատրման ֆոնդի հաշվին: Հետևաբար՝ Երևանի քաղաքապետարանի տեղեկատվության և հասարակայնության հետ կապերի վարչության այս պատասխանն անհասկանալի է, եթե ոչ՝ հանրությանն ուղղակի մանիպուլացնելու փորձ։
Միաժամանակ հայտնել են, որ առաջին եռամսյակի պարգևավճարների ֆոնդը կազմել է 414.109.800 դրամ, որից 137.580.000 դրամ վճարվել է Երևանի քաղաքապետարանի ենթակայության արտահիվանդանոցային ծառայություն իրականացնող կազմակերպությունների բուժաշխատողներին պարգևատրելու համար:
Երևանի քաղաքապետարանի տեղեկատվության և հասարակայնության հետ կապերի վարչությունը հայտնել է նաև, որ ամսական պարգևավճարների վերաբերյալ կարգադրությունները տեղադրված են Երևանի քաղաքապետարանի պաշտոնական www.yerevan.am կայքի «Իրավական ակտեր» բաժնի «Քաղաքապետի կարգադրություններ» ենթաբաժնում:
Սակայն պետք է նշենք, որ Երևանի քաղաքապետարանի կայքում 2020 թվականի պարգևատրումների վերաբերյալ հրապարակված է քաղաքապետ Հայկ Մարությանի ընդամենը 8 կարգադրություն, որոնցով հատկացված պարգևավճարների հանրագումարը ոչ թե 276.529.800, այլ 66.524.001 ՀՀ դրամ է՝ ավելի քան 4 անգամ պակաս մեզ տրամադրված թվից։ Նույնը կարելի է ասել աշխատակիցների թվի մասին. մեզ տրամադրված պատասխանում նշվում է, որ պարգևատրվել է 1722 աշխատակից, մինչդեռ հրապարակված կարգադրություններով պարգևատրված աշխատակիցների թիվն անհամեմատ փոքր է։
Հրապարակված կարգադրությունները՝ ստորև.
Հետևաբար, կարելի է միանշանակ եզրակացնել, որ քաղաքապետի՝ պարգևատրումների վերաբերվող ոչ բոլոր կարգադրություններն են հրապարակվում պաշտոնական կայքում։ Ուստի՝ լրատվականներն ու հանրությունը՝ առանց տեղեկություն ստանալու հարցման և պատասխանի, չեն կարող տիրապետել Երևանի քաղաքապետարանում պարգևավճարների մասին ամբողջական տեղեկատվությանը։
Թե ինչ նպատակով չեն հրապարակվում Երևանի քաղաքապետարանի խոշոր չափերով պարգևատրումների վերաբերյալ կարգադրությունները, կարծում ենք, կարելի է կռահել։
Հարցման պատասխանը՝ ստորը.
Աղբյուր՝ AntiFake.am
► ՊԵԿ-ում առաջին եռամսյակի պարգևավճարները կազմել են 1 մլրդ 39 մլն դրամ
► Վարչապետի աշխատակազմում առաջին եռամսյակի պարգևավճարները կազմել են 46.000 դոլար (22.3 մլն դրամ)
► Նախագահի աշխատակազմում փետրվար ամսին հատկացվել է 33,4 մլն դրամ պարգևավճար
► ԿԳՄՍՆ-ում 94 միլիոն դրամի պարգևավճարներ են բաժանվել 2020թ. առաջին եռամսյակում
► Քննչական կոմիտեում 2020թ. առաջին եռամսյակում հատկացվել է շուրջ 354 միլիոն դրամի (730.000 դոլար) պարգևավճար
► Հանրային հեռուստաընկերությունում 32,6 մլն դրամ պարգևավճար է հատկացվել 2020թ. առաջին եռամսյակում