AntiFake.am-ը շարունակում է հանրությանը ներկայացնել պետական ապարատի տարբեր կառույցներում հատկացվող ահռելի պարգևավճարների չափը։ Այս շարքով ներկայացնում ենք 2020 թվականի առաջին եռամսյակի ընթացքում պետական տարբեր կառույցներում հատկացված պարգևավճաների չափը։
AntiFake.am-ը հարցում էր ուղարկել ՀՀ աշխատանքի և սոցիալական հարցերի նախարարություն՝ խնդրելով տրամադրել կառույցում 2020 թվականի առաջին եռամսյակի ընթացքում հատկացված պարգևատրումների ընդհանուր չափը։
Ի պատասխան՝ նախարարության մամուլի քարտուղար Ս. Մարտիրոսյանը հայտնել է, որ 2020թ.-ի առաջին եռամսյակի ընթացքում պարգևավճարների ընդհանուր գումարը կազմել է 126.220.597 ՀՀ դրամ, որից՝ փետրվարին հատկացվել է 121.240.002 դրամ, իսկ մարտին 4.980.595 դրամ։ Հունվարին նախարարության աշխատակիցներին պարգևավճար չի հատկացվել։
Միաժամանակ հայտնել են, որ նշված ժամանակահատվածում նախարարի և նախարարի տեղակալների պարգևավճարների ընդհանուր գումարը կազմել է 7.454.072 դրամ, որը նրանք ստացել են փետրվարին։
Նկատենք, որ 2019 թվականին նախարարությունում ընդհանուր առմամբ տրամադրվել էր 237.148.239 դրամ պարգևավճար։ Այսինքն՝ միայն 2020 թվականի առաջին եռամսյակի ընթացքում արդեն իսկ հատկացվել է նախորդ ամբողջ տարվա ընթացքում հատկացված պարգևավճարների կեսը։
Աղբյուր՝ AntiFake.am