AntiFake.am-ը շարունակում է հանրությանը ներկայացնել պետական ապարատի տարբեր կառույցներում հատկացվող ահռելի պարգևավճարների չափը։ Այս շարքով ներկայացնում ենք 2020 թվականի առաջին եռամսյակի ընթացքում պետական տարբեր կառույցներում հատկացված պարգևավճաների չափը։
AntiFake.am-ը հարցում էր ուղարկել նախարարություններ՝ խնդրելով տրամադրել կառույցում 2020 թվականի առաջին եռամսյակի ընթացքում հատկացված պարգևատրումների ընդհանուր չափը։ Հարցումների պատասխանների արդյունքները ներկայացնում ենք ստորև.
ՀՀ աշխատանքի և սոցիալական հարցերի նախարարության մամուլի քարտուղար Ս. Մարտիրոսյանը հայտնել է, որ 2020թ.-ի առաջին եռամսյակի ընթացքում պարգևավճարների ընդհանուր գումարը կազմել է 126.220.597 ՀՀ դրամ, որից՝ փետրվարին հատկացվել է 121.240.002 դրամ, իսկ մարտին 4.980.595 դրամ։ Հունվարին նախարարության աշխատակիցներին պարգևավճար չի հատկացվել։
Միաժամանակ հայտնել են, որ նշված ժամանակահատվածում նախարարի և նախարարի տեղակալների պարգևավճարների ընդհանուր գումարը կազմել է 7.454.072 դրամ, որը նրանք ստացել են փետրվարին։
Արտաքին գործերի նախարարության Լրատվության և հանրային դիվանագիտության վարչության պետ Սերոբ Բեջանյանը հայտնել է, որ 2020թ. առաջին եռամսյակում նախարարության աշխատակիցների հատկացված պարգևավճարների ընդհանուր չափը կազմել է 72.147.954 ՀՀ դրամ, որից մարտին՝ 37.582.466 ՀՀ դրամ, փետրվարին՝ 27.641.814 ՀՀ դրամ, մարտին՝ 6.923.674 ՀՀ դրամ։
Միաժամանակ հայտնել են, որ արտգործնախարար Զոհրաբ Մնացականյանը հունվար և փետրվար ամիսներին ստացել է ընդհանուր 1.530.200 դրամ պարգևավճար, նախարարի տեղակալ Շավարշ Քոչարյանը՝ նույն ժամանակահատվածում՝ 1.116.096 դրամ, մյուս տեղակալը՝ Գրիգոր Հովհաննիսյանը ստացել է 1.041.748 դրամ, տեղակալ Ավետ Ադոնցը՝ 1.084.476 դրամ, իսկ Արտակ Ապիտոնյանը՝ 1.210.318 դրամ։
Հարցման պատասխանը՝ ստորև.
Առողջապահության նախարարության գլխավոր քարտուղարի տեղակալ Վահե Հակոբյանը հայտնել է, որ կառույցում 2020թ. առաջին եռամսյակում «Պարգևատրումներ, դրամական խրախուսումներ և հատուկ վճարումներ» հոդվածից տրամադրված պարգևատրումները կազմել են հունվար ամսվա համար 8.377.855 ՀՀ դրամ՝ ներառյալ հարկերը, փետրվար ամսվա համար՝ 17.426.895 դրամ՝ ներառյալ հարկերը, իսկ մարտ ամսվա համար՝ 20.733.954 դրամ՝ ներառյալ հարկերը։ Ընդհանուր՝ պարգևատրումների չափը կազմել է 46.538.704 ՀՀ դրամ։
Նախարարի և տեղակալների պարգևավճարների չափը չի տրամադրվել և հղում է արվել բարձրաստիճան պաշտոնատար անձանց էթիկայի հանձնաժողովի կայքին, որտեղ նշված անձանց հայտարարագրերը դեռ հրապարակված չեն։
Հարցման պատասխանը՝ ստորև.
Արդարադատության նախարարության գլխավոր քարտուղար Սուրեն Գալստյանը հայտնել է, որ նախարարության աշխատակիցների պարգևավճարների գումարը (ներառյալ հարկերը) 2020 թվականի առաջին եռամսյակում կազմել է 57.089.300 դրամ, այդ թվում՝ հունվար և փետրվար ամիսների համար համապատասխանաբար՝ 28.981.200 դրամ և 28.108.100 դրամ:
Միաժամանակ տեղեկացրել են, որ նախարարի և նրա տեղակալների պարգևավճարների գումարը (ներառյալ հարկերը) 2020 թվականի առաջին եռամսյակում կազմել է 9.519.200 դրամ, այդ թվում ըստ ամիսների` նախարար Ռուստամ Բադասյանը հունվար և փետրվար ամիսներին ստացել է ընդհանուր 2.395.400 ՀՀ դրամ, նախարարի առաջին տեղակալ Ռաֆիկ Գրիգորյանը նույն ժամանակահատվածում ստացել է 2.002.200 դրամ, նախարարի տեղակալները (թվով՝ 3) ստացել են 1.707.200-ական դրամ, այսինքն՝ 5.121.600 դրամ։
Հարցման պատասխանը՝ ստորև.
Արտակարգ իրավիճակների նախարարության գլխավոր քարտուղար Վահագն Օհանյանը հայտնել է, որ Արտակարգ իրավիճակների նախարարության համակարգի թվով 3645 աշխատակիցներ 2020թ. առաջին եռամսյակում ստացել են 407.689.909 ՀՀ դրամ պարգևավճար, այդ թվում՝ հունվար ամսին 319.476.126 ՀՀ դրամ, փետրվար ամսին` 18.889.858 ՀՀ դրամ, մարտ ամսին՝ 28.844.173 ՀՀ դրամ։
Տեղեկացրել է նաև, որ ՀՀ կառավարության 2011թ. հոկտեմբերի 20-ի 1510-Ն որոշման հավելվածի 5-րդ գլխի 53 և 54 կետերի համաձայն՝ քաղաքացիական ծառայողներին, կիսամյակային կատարողականների հիման վրա, նաև տրամադրվել է 40.479.752 ՀՀ դրամ պարգևավճար։
Հայտնել է նաև, որ Արտակարգ իրավիճակների նախարարը և նախարարի տեղակալները 2020թ. առաջին եռամսյակի ընթացքում պարգևավճար չեն ստացել:
Բարձր տեխնոլոգիական արդյունաբերության նախարարության գլխավոր քարտուղար Շ. Մեժլումյանը տեղեկացրել է, որ 2020թ. առաջին եռամսյակի պարգևատրումների վերաբերյալ տեղեկատվությունը հասանելի է նախարարության պաշտոնական կայքի Ծրագրեր և գերակա խնդիրներ բաժնի Բյուջե ենթաբաժնում՝ նկատի ունենալով ԲՏԱ նախարարության կողմից աշխատակիցներին հատկացված աշխատավարձի և պարգևատրման տարեկան ֆոնդի վերաբերյալ տեղեկատվությունը։ Ճշգրտող հարցին նախարարության մամուլի քարտուղարը պատասխանել է, որ պարգևատրման տարեկան ֆոնդը հավասարաչափ բաշխվում է եռամսյակների վրա, ինչից կարելի է եզրակացնել, որ առաջին եռամսյակում կառույցում հատկացվել է 34.181.175 ՀՀ դրամ պարգևավճար։ Նախարարության հաստիքների թիվը 198 է։
Միևնույն ժամանակ տեղեկացրել են, որ հայտարարատու հանդիսացող աշխատակիցների վերաբերյալ տեղեկատվությանը կարող ենք ծանոթանալ հայտարարագրերի հրապարակումից հետո http://cpcarmenia.am/hy/ կայքում:
ՀՀ էկոնոմիկայի նախարարության գլխավոր քարտուղարի տեղակալ Արմինե Խառատյանը հայտնել է, որ 2020 թվականի առաջին եռամսյակի ընթացքում տրվել է պարգևատրում 138.503.524 դրամի չափով, որից.
1.1 2019 թվականի երկրորդ կիսամյակի կատարողականների արդյունքներով Հայաստանի Հանրապետության էկոնոմիկայի նախարարության միայն քաղաքացիական ծառայողներին` 282 անձ, տրվել է 61.150.400 դրամ պարգևատրում՝ 2020 թվականի պետական բյուջեով նախատեսված «Քաղաքացիական, դատական և պետական այլ ծառայողների պարգևատրման ֆոնդ»-ի միջոցներից:
1.2 ՀՀ էկոնոմիկայի նախարարության «Պարգևատրումներ, դրամական խրախուսումներ և հատուկ վճարումներ» հոդվածով նախատեսված միջոցների և «Աշխատողների աշխատավարձեր և հավելավճարներ» հոդվածով նախատեսված միջոցների տնտեսման հաշվին նախարարության աշխատակիցներին՝ 353 անձ, տրվել է 77.353.124 դրամ պարգևատրում:
Միաժամանակ հայտնել են, որ հայտարարատու պաշտոնատար անձանց պարգևավճարների մասին տեղեկատվությունը օրենսդրությամբ սահմանված ժամկետներում և կարգով հրապարակվում է:
Կրթության, գիտության, մշակույթի և սպորտի նախարարության գլխավոր քարտուղար Նաիրի Հարությունյանը տեղեկացրել է, որ առաջին եռամսյակի համար` 01.01.2020թ. մինչև 31.03.2020թ., նախարարության «Պարգևատրումներ, դրամական խրախուսումներ և հատուկ վճարներ» հոդվածով եռամսյակային գումարը կազմում է ընդհանուր աշխատավարձի ֆոնդի 13.77 %-ը` 41.356.200 դրամ, «Քաղաքացիական, դատական և պետական այլ ծառայողների պարգևատրում» հոդվածով ընդհանուր աշխատավարձի ֆոնդի 17.56 %-ը` 52.741.000 դրամ: Այսինքն 2020թ. առաջին եռամսյակում ԿԳՄՍՆ-ում հատկացվել է ընդհանուր՝ 94.097.200 դրամ պարգևավճար, որը համարժեք է շուրջ 195.000 դոլարին։
Պատասխանում տեղեկացրել են նաև, որ 2020թ. առաջին եռամսյակի ԿԳՄՍ նախարարության ընդհանուր աշխատավարձի ֆոնդը կազմում է 300.374.800 դրամ:
Հարցման պատասխանով չի տրամադրվել նախարարի և փոխնախարաների պարգևատրումների չափի մասին տեղեկությունը հետևյալ պատճառաբանությամբ. «Նախարարը և նախարարի տեղակալները համարվում են եկամուտների հայտարարատու պաշտոնյա անձինք, որոնց վերաբերյալ առավել մանրամասն տեղեկատվությանը կարող ենք ծանոթանալ եկամուտների հայտարարագրերի հրապարակումից հետո»:
Շրջակա միջավայրի նախարարության գլխավոր քարտուղարի պաշտոնակատար Վ. Ջիլավյանը հայտնել է, որ նախարարությունում առաջին եռամսյակի պարգևատրումները «Պարգևատրումներ, դրամական խրախուսումներ և հատուկ վճարներ» հոդվածով հունվարին կազմել է 5.745.100 դրամ, փետրվարին՝ 18.157.800 դրամ, իսկ մարտին չի հատկացվել։ Իսկ «Քաղաքացիական, դատական և պետական այլ ծառայողների պարգևատրում» հոդվածով հունվար ամսին հատկացվել է 31.199.900 դրամ պարգևավճար։ Այսպիսով՝ կառույցում նշված ժամանակահատվածում ընդհանուր առմամբ հատկացվել է 55.102.800 դրամ պարգևավճար։
Հայտնել են նաև, որ նախարար Էրիկ Գրիգորյանը պարգևատրվել է հունվարին 1.197.700, իսկ փետրվարին՝ 1.215.500 դրամի չափով, այսինքն՝ նշված ժամանակահատվածում ընդհանուր՝ 2.413.200 դրամի չափով։ Իսկ 2 տեղակալները հունվաին պարգևատրվել են 853.600-ական, իսկ փետրվարին՝ 871.300-ական դրամի չափով։ Այսինքն՝ նախարարն ու տեղակալները միասին նշված ժամանակահատվածում պարգևատրվել են 5.863.000 դրամի չափով։
ՀՀ տարածքային կառավարման և ենթակառուցվածների նախարարության գլխավոր քարտուղարին փոխարինող Հ. Բատիկյանը հայտնել է, որ 2020թ. առաջին եռամսյակում նախարարության աշխատակիցներին տրամադրված պարգևավճարների ընդհանուր գումարը կազմել է 99.428.397 դրամ, որը հատկացվել է հունվար, փետրվար ամիսներին: Մարտին նախարարության աշխատակազմը պարգևավճար չի ստացել:
Պարգևավճարները հատկացվել են օրենքով սահմանված կարգով «Պարգևատրումներ, դրամական խրախուսումներ և հատուկ վճարներ», «Քաղաքացիական, դատական և պետական այլ ծառայողների պարգևատրում», «Աշխատողների աշխատավարձեր և հավելավճարներ» հոդվածներով նախատեսված միջոցներից։
Նախարարի և տեղակալների պարգևավճարների մասին տեղեկատվություն չի տրամադրվել։
Ֆինանսների նախարարության գլխավոր քարտուղար Վազգեն Հարությունյանը տեղեկացրել է, որ նախարարության աշխատակիցներին 2020թ. առաջին եռամսյակի ընթացքում պարգևատրման ֆոնդից հաշվարկվել է 138.593.661 ՀՀ դրամ պարգևավճար, որից հունվարին՝ 26.115.654, փետրվարին՝ 98.682.531, իսկ մարտին՝ 13.795.476 ՀՀ դրամ։
Միաժամանակ տեղեկացրել են, որ ՀՀ ֆինանսների նախարարը և նախարարի տեղակալները 2020թ. առաջին եռամսյակի ընթացքում պարգևատրվել են 3 անգամ՝ ընդհանուր՝ 12.101.565 դրամի չափով, որից՝ հունվարին՝ 4.252.011, փետրվարին՝ 3.974.173, իսկ մարտին՝ 3.875.381 ՀՀ դրամի չափով։
Պաշտպանության նախարարությունը մերժել է 2020թ. առաջին եռամսյակում հատկացվող պարգևավճարների ընդհանուր չափի մասին տեղեկատվության տրամադրումը։ ՊՆ հայտարարագիր ներկայացնող անձանց մասով տեղեկատվությունը նույնպես մերժվել է։ Այս մասին տեղեկացրել է գլխավոր քարտուղար Ա. Սարգսյանը։
Հոդվածի ռուսերեն տարբերակը.
Աղբյուր՝ AntiFake.am