Երեկ՝ մայիսի 14-ին, ՀՀ արտգործնախարարությունը տեղեկատվություն է տարածել, ըստ որի՝ ռուսական կողմի նախաձեռնությամբ հեռախոսազրույց է տեղի ունեցել ՌԴ ԱԳՆ Սերգեյ Լավրովի և ՀՀ ԱԳՆ Զոհրաբ Մնացականյանի միջև։
«Հայաստանի և Ռուսաստանի արտաքին քաղաքական գերատեսչությունների ղեկավարները քննարկեցին երկկողմ օրակարգին, ինչպես նաև տարածաշրջանային կառույցների՝ ԱՊՀ, ԵԱՏՄ և ՀԱՊԿ շրջանակներում փոխգործակցությանն առնչվող հարցեր:
Զոհրաբ Մնացականյանը և Սերգեյ Լավրովն անդրադարձ կատարեցին ԼՂ խաղաղ գործընթացին: Նոր տիպի կորոնավիրուսով պայմանավորված խնդիրների հասցեագրման համատեքստում ԱԳ նախարար Զոհրաբ Մնացականյանը կարևորեց հակամարտության բոլոր կողմերի անվերապահ հանձնառությունն ապրիլի 21-ին Մինսկի խմբի համանախագահների մասնակցությամբ և միջնորդությամբ ընդունված հնգակողմ հայտարարության դրույթներին». ասված է հայտարարության մեջ։
Համաձայն ապրիլի 21-ին հրապարակված ԵԱՀԿ Մինսկի խմբի համանախագահների և Հայաստանի և Ադրբեջանի արտաքին գործերի նախարարների համատեղ հայտարարության՝«...Նրանք նաև դիտարկել են Լեռնային Ղարաբաղյան հիմնախնդրի կարգավորման գործընթացում իրականացվող հաջորդ քայլերը՝ համաձայն 2020 թվականի հունվարի 30-ին Ժնևում թողարկված իրենց համատեղ հայտարարության»։
Հաջորդ քայլը. այս դեպքում ինչ է ենթադրում 2020թ. հունվարի 30-ի հայտարարությունը։
Հայտարարության մեջ ասվում է. «Եռօրյա քննարկումների ընթացքում համանախագահները և նախարարները քննարկել են հետևյալ օրակարգային հարցեր՚ 2019թ. քննարկված համաձայնությունների և առաջարկների իրականացումը, ապագա կարգավորման հիմքը ձևավորող սկզբունքները և տարրերը, կարգավորման գործընթացի առաջմղմանն ուղղված ժամանակացույցը և օրակարգը:
ԵԱՀԿ Մինսկի խմբի համանախագահները վերահաստատեցին հակամարտության խաղաղ կարգավորման ուղղությամբ կողմերին աջակցելու և կարգավորման գործընթացի կոնֆիդենցիալության սկզբունքի հանդեպ իրենց լիակատար հանձնառությունը, ինչպես նաև արդար և կայուն խաղաղության հասնելու փոխզիջման ոգու և ստեղծարարության անհրաժեշտությունը»:
Այս հայտարարությունից հերթական անգամ կարող ենք անել եզրակացություններ, որ այսօր Լեռնային Ղարաբաղի հակամարտության խաղաղ կարգավորման բանակցություններում կա հստակ օրակարգ, քննարկվում են հստակ սկզբունքներ և տարրեր: Կա կարգավորման գործընթաց, որին հավատարիմ են մնում կողմերը, և որի ժամանակացույցը և օրակարգը քննարկվում է նաև հիմա:
Պետք է նշել, որ նման օրակարգը այսօր հետևողականորեն հերքվում է հայկական իշխանությունների կողմից՝ չնայած դրա ակնհայտ առկայությանը: Սերգեյ Լավրովի հայտնի հայտարարությունից հետ հայկական իշխանությունները փորձում են հերքել բանակցվող օրակարգի առկայությունը, առավել ևս Լավրովի կողմից մատնանշվող փաթեթի շրջանակներում, սակայն այս ամենը առավել քան ապացուցում է այսօր Լեռնային Ղարաբաղի հակամարտության կարգավորման բանակցություններում հայկական կողմի դիրքորոշումը:
Հեղինակ՝ Մելինե Հայրապետյան
Աղբյուր՝ AntiFake.am