Փաշինյանը մանիպուլացրել է ՀՀ-ի վերաբերյալ միջազգային զեկույցների ցուցանիշները, իսկ բացասական գնահատականները՝ թաքցրել

Այսօր արդեն ավանդույթ դարձած ասուլիսի ընթացքում Նիկոլ Փաշինյանը հրապարակեց հերթական «100 փաստը Նոր Հայաստանի մասին»։ Այս անգամ նույնպես հարցերի շրջանակը լայն էր։

Փաշինյանը, ինչպես և միշտ, անդրադարձավ միջազգային ասպարեզում Հայաստանի գրանցած նոր ցուցանիշներին։ Մասնավորապես, դրան էր նվիրված փաստերի տրցակի 68-76-րդ կետերը.

«68. Բրիտանական «Էկոնոմիստ Ինթելիջենս Յունիթ» հետազոտական և խորհրդատվական ընկերության կողմից հրապարակված «Ժողովրդավարության համաթիվ 2019» զեկույցում Հայաստանն իր դիրքը բարելավել է միանգամից 17 հորիզոնականով՝ առաջ անցնելով հարևան բոլոր երկրներից: Նախորդ զեկույցում զբաղեցրած 103-րդ տեղից Հայաստանը հայտնվել է 86-րդ տեղում։

69. «Varieties of Democracy» ինստիտուտի հրապարակած ամենամյա «Ժողովրդավարություն 2020» զեկույցի համաձայն՝ Հայաստանը հայտնվել է ժողովրդավարության ոլորտում ամենախոշոր առաջընթաց արձանագրած 4 երկրների շարքում։ Զեկույցում ներկայացված 6 ինդեքսներից 5-ում Հայաստանը, նախորդ տարվա համեմատ, գրանցել է զգալի առաջընթաց՝ բարելավելով իր դիրքերը։

70. Հայաստանը «Heritage Foundation»-ի կողմից հրապարակվող «Տնտեսական ազատության ինդեքս 2020»-ում 180 երկրների շարքում զբաղեցրել է 34-րդ հորիզոնականը՝ «չափավոր ազատ» երկրների խմբից տեղափոխվելով «հիմնականում ազատ» երկրների խումբ: Անցյալ տարվա համեմատ՝ Հայաստանի դիրքը բարելավվել է 13 հորիզոնականով։

71. Ըստ Բերտելսմանի տրանսֆորմացիայի 2020 թվականի ցուցիչի՝ Հայաստանն առաջընթաց է արձանագրել սահմանված բոլոր 3 չափորոշիչներով՝ մասնավորապես, 38 հորիզոնականով բարելավել է դիրքերը քաղաքական, 4 հորիզոնականով՝ տնտեսական և 30 հորիզոնականով՝ կառավարման չափորոշիչներում: Հայաստանը քաղաքական տրանսֆորմացիայի մասով աշխարհում 34-րդն է, տնտեսական տրանսֆորմացիայով՝ 43-րդը և կառավարման ցուցիչով՝ 55-րդը:

72. «Freedom House»-ի «Ազատությունն աշխարհում 2020» զեկույցի համաձայն՝ Հայաստանը 2 միավորով բարելավել է իր ցուցանիշը և, ստանալով 53 միավոր, շարունակել է մնալ «մասամբ ազատ» երկրների շարքում։ Նույն կառույցի կողմից հրապարակվող «Անցումային երկրներ 2020» զեկույցի համաձայն՝ վերջին 2 տարիներին Հայաստանը գրանցել է զեկույցի պատմության մեջ ժողովրդավարության բարելավման ամենամեծ երկամյա ցուցանիշը։

73. «Բիզնեսի համար լավագույն եվրոպական երկրներ 2020» զեկույցի համաձայն՝ Հայաստանը համարվել է ամենամեծ առաջընթաց գրանցած երկրներից մեկը և 6 հորիզոնականով բարելավել իր դիրքերը՝ զբաղեցնելով 33-րդ հորիզոնականը։

74. «Transparency International» հակակոռուպցիոն կենտրոնի «Կոռուպցիայի ընկալման ինդեքս 2019» զեկույցի համաձայն՝ Հայաստանն իր դիրքերը, 2018 թվականի վերլուծության համեմատ, բարելավել է 7 միավորով ու 28 հորիզոնականով՝ զբաղեցնելով 77-րդ հորիզոնականը։

75. Արևելյան և Հարավարևելյան Եվրոպայի Ֆրիդրիխ Նաուման հիմնադրամի և «Ազատության բարոմետր ինդեքսի» հեղինակների կողմից հրապարակված «Մարդու իրավունքների ինդեքս 2019» զեկույցի համաձայն՝ Հայաստանը 5․78 միավորից բարձրացրել է իր միավորը մինչև 6․10 և հայտնվել 37-րդ հորիզոնականում։

76. «Freedom Barometer 2019»-ի տվյալներով՝ Հայաստանը, նախորդ տարվա համեմատ, իր դիրքերը բարելավել է 7.21 միավորով և, ստանալով 60.14 միավոր, 45 երկրների շարքում զբաղեցրել է 35-րդ հորիզոնականը՝ նախորդ տարվա 37-րդ հորիզոնականի փոխարեն։ Զեկույցում արձանագրված է, որ 2019 թվականին փոքրաթիվ երկրների է հաջողվել առաջընթաց արձանագրել օրենքի գերակայության ապահովման հարցում, և Հայաստանն ու Հյուսիսային Մակեդոնիան դրա վառ օրինակներն են»:

Նիկոլ Փաշինյանը, այս ցուցանիշները թվարկելով, շեշտեց, որ այս սանդղակներում Հայաստանը հայտնվել է, քանի որ իրենց «ստարտը» սկսվել է` բարձրանալով աղյուսակների 90-100-110-րդ հորիզոնականներից:

Այն, որ վերոնշյալ վարկանիշային ցուցակներում Հայաստանը սանդղակային առաջընթաց ունի, ճիշտ է, սակայն կարևորը այն է, թե ինչ է թաքցնում այստեղ Նիկոլ Փաշինյանը՝ խոսելով միայն տվյալ զեկույցների դրական կողմերի մասին:

1. Բերտելսմանի հիմնադրամը, հրապարակելով հանդերձ Հայաստանի բարելաված ցուցանիշները, որոնք վերաբերում են 2017 թվականի դեկտեմբերի 1-ից մինչև 2019թ. հունվարի 31-ին, նշում է, որ «նոր կառավարությունը ստիպված  է բավարարել այն քաղաքացիների սպասելիքները և պահանջները, որոնք ցանկանում են կառուցել իրական ժողովրդավարություն և բարելավել իրենց կենսապայմանները: Չնայած «գլխապտույտ» էյֆորիան արդեն իսկ անցել է, փոփոխությունները շարունակվում են, քանի որ Հայաստանը շարունակում է ենթարկվել ռիսկային տրանսֆորմացիայի»:

Այստեղ հարկ է նշել, որ վերոնշյալ զեկույցը հնացած է ավելի քան մեկ տարով, և մենք անհամբեր կսպասենք 2022 թվականին հրապարակվելիք հաջորդ զեկույցի գնահատականներին:

2. «Freedom House» միջազգային իրավապաշտպան կազմակերպության հրապարակած զեկույցի մասին վերջերս շատ է խոսվում: Բանն այն է, որ կառույցը շարունակում է Հայաստանին համարել «կիսակոնսոլիդացված ավտորիտար ռեժիմ» ունեցող պետություն: Իսկ ժողովրդավարության աստիճանը որոշող միավորը ընդամենը մեկով է ավելի նախորդ տարում գրանցած ցուցանիշից (32-ից դառնալով 33՝ 100 միավորանոց սանդղակով):

Սակայն Նիկոլ Փաշինյանը այս իմաստով չի շտապում հայտարարություններ անել և նշել, որ զեկույցում, չնայած այն մի միավորով բարձրացրել է Հայաստանի ցուցանիշը, տեղ են գտել ներկայիս իշխանությունների օրոք իրականացված բոլոր անօրինականությունները և իրավական ու դատական համակարգի վրա ճնշումները: Այս առումով Նիկոլ Փաշինյանը որդեգրել է ԱՄՆ դեսպանատան քաղաքականությունը, որը, մանիպուլյացիոն գործիքակազմ կիրառելով, չնչին աստիճանային բարձրացումները ներկայացնում է որպես մեծ առաջընթաց: Նիկոլ Փաշինյանի համար մեծ նշանակություն ունի 1 թիվը, սակայն զեկույցի բովանդակությունը, ինչպես և մյուս դեպքերում, նրան ցանկալի չեն, և ըստ այդմ՝ չեն բարձրաձայնվելու:

Նիկոլ Փաշինյանը իհարկե նաև թաքցրեց հանրությունից, որ նույն զեկույցն արձանագրել է, որ Հայաստանը կիսակոնսոլիդացված ավտորիտար ռեժիմ ունեցող պետություն է։

3. Անհրաժեշտ է նշել, որ “European Chamber” կոչվող միջազգային կազմակերպությունը (NGO) իր զեկույցների համար հիմք է ընդունում “Transparency International” կազմակերպության կողմից գնահատված կոռուպցիայի ընկալման ինդեքսը՝ համապատասխան վարկանիշավորում անելու համար: Հաշվի առնելով այն փաստը, որ “Transparency International” կազմակերպության հայաստանյան մասնաճյուղը գործուն դեր է խաղում Հայաստանում այսօրվա կառավարության և օրենսդիր մարմնի աշխատանքներում, կառույցն ունի մի շարք պատգամավորներ Ազգային ժողովում և ներկայացուցիչներ գործադիր իշխանության մարմիններում` չենք կարող համարել, որ այս զեկույցի հիմքում կարող են ընկած լինել օբյեկտիվ գնահատականներ:

4. «Freedom Barometer 2019» զեկույցի առնչությամբ Նիկոլ Փաշինյանը հպարտորեն հայտարարում է` զեկույցը արձանագրել է, որ Հայաստանը այն փոքրաթիվ երկրներից է, որին հաջողվել է առաջընթաց գրանցել օրենքի գերակայության ոլորտում:

Այնուամենայնիվ, զեկույցի «Օրենքի գերակայություն» բաժնում ասվում է. «Հայաստանում դատական համակարգը առերեսվում է բազմաթիվ մարտահրավերների, որոնք վտանգում են դրա անկախությունը: Մեծ ազդեցություն կա իշխանության գործադիր ճյուղի կամ շահագրգիռ կողմերի կողմից կոռուպցիայի կամ քաղաքական ճնշման միջոցով քաղաքականապես զգայուն դատական գործերի և ֆինանսական բնույթ ունեցող գործերի նկատմամբ: Քրեական գործերի դեպքում դատավորները հաճախ միտված են հետևելու դատախազին` առանց պատշաճ քննության: 2018թ. տեղի ունեցած համաներումը Հայկական առաջին հանրապետության 100 ամյակի առիթով, մի կողմից որևէ կերպ թեթևացրել է բանտերում առկա իրավիճակը, բայց մյուս կողմից էլ քննադատվեց որպես քաղաքական կողմնապահություն՝ իր շահառուներին որոշելու հարցում»:

Ինչպես և կարող ենք համոզվել, Նիկոլ Փաշինյանի համար կարևոր են միայն վարկանիշները, իսկ տվյալ զեկույցների բովանդակությունը, բացասական գնահատականները, զեկույցներում բարձրացված մտահոգությունները նրան ամենևին չեն հուզում, որոնք թաքցնելով` նա փորձում է առաջընթաց ցույց տալ, ըստ այդմ՝ մանիպուլացնում է զեկույցներն իրեն ձեռնտու ոճով:

Հարկ է նշել, որ Նիկոլ Փաշինյանը սովորություն ունի նաև տարվա ընթացքում որպես ձեռքբերում ներկայացնել գնված հոդվածներ, հրապարակել անհայտ աղբյուրներից վերցված և որևէ միջազգային նշանակություն չունեցող զեկույցներ ու վարկանիշներ և դրանք ներկայացնել որպես Հայաստանի գրանցած հաջողություն միջազգային հարթակում:  Օրինակները շատ են:

 

Հեղինակ՝ Մելինե Հայրապետյան

Աղբյուր՝ AntiFake.am