Երևանի քաղաքապետ Հայկ Մարությանը իր նախընտրական քարոզարշավում փոփոխություններ էր խոստանում մի շարք ոլորտներում, մասնավորապես՝ աղբահանության և տրանսպորտի ոլորտում։ Վերջինս ոչ միայն խոստանում էր լուծել աղբահանության խնդիրը, այլ նաև «Սանիթեք» ընկերությունից բացի ներգրավել այլ օպերատորի։
Սակայն պետք է արձանագրենք, որ վերջինիս ընտրությունը քաղաքապետի պաշտոնում ոչ մի ձևով չհանգեցրեց աղբահանության խնդրի լուծմանը: Արդեն շուրջ ութը ամիս է, ինչ Մարությանը զբաղեցնում է Երևանի քաղաքապետի պաշտոնը, սակայն ոչ մի դրական փոփոխություն այդ հարցում նկատելի չէ, դեռ ավելին, օր օրի աղբահանության վիճակը էլ ավելի է վատթարանում:
Նախկինում խոսելով աղբայանության խնդրի մասին՝ Հայկ Մարությանը մեղադրում էր «Սանիթեքին»-ին և նախկին իշխանություններին: Երեկ Երևանի քաղաքապետարանի մամուլի խոսնակ Հակոբ Կարապետյանը գրառում էր կատարել իր ֆեյսբուքյան էջում՝ նշելով, որ միակ օպերատորի աշխատանքը ավելի անբավարար է դարձել, և հայցել էր քաղաքացիների ներողամտությունը:
Թե՛ Հայկ Մարությանը, թե՛ Հակոբ Կարապետյանը նշել են, որ մի շարք աշխատանքներ են տարվում խնդիրը կարգավորելու համար: Բայց այդ պնդումները, թէ որևէ աշխատանքներ են կատարվում, կարող ենք համարել սուտ, քանի որ քաղաքի աղբահանությունը գտնվում է անմխիթար վիճակում: Առնվազն հարց է առաջանում. եթե աշխատանքներ են տարվում, ապա ինչու մինչ այս պահը որևէ արդյունք չկա, ինչու աղբայանությունը պատշաճ չի կատարվում, և ինչու մինչ այս պահը նոր օպերատոր ներգրավված չէ:
Հայկ Մարությանի այն հայտարարությունը, թե տվյալ խնդրում գլխավոր մեղավորը նախկին իշխանություններն ու «Սանիթեք»-ն են, խոսում է վերջինիս անպատասխանատվության մասին, քանի որ դառնալով Երևանի քաղաքապետ՝ նա պատշաճ քայլեր չի ձեռնարկել, կամ ձեռնարկված քայլերը բավարար չեն եղել խնդրին լուծում տալու համար:
Այսպիսով, կարող ենք արձանագրել, որ հերթական անգամ գործ ունենք նախընտրական քարոզարշավի ընթացքում ընտրվելու նպատակով տրված, սակայն ընտրվելուց հետո չկատարված խոստման հետ։
Տեղադրված նկարները ցույց են տալիս քաղաքում տիրող վիճակը: Նկարներն արվել են ապրիլի 11-ին և 12-ին Նոր Նորք, Դավիթաշեն, Քանաքեռ-Զեյթուն, Արաբկիր և Կենտրոն վարչական շրջաններում։
Հիշեցնենք նաև, որ համահայկական շաբաթօրյակից հետո քաղաքը ևս լի էր աղբով:
