Նիկոլ Փաշինյանը կրկին խեղաթյուրված է ներկայացրել Գարեգին Նժդեհի կենսագրությունը

Մայիսի 16-ին տեղի ունեցած մամուլի ասուլիսի ընթացքում վարչապետ Նիկոլ Փաշինյանը ներկայացրել էր նոր «100 փաստ», որոնք լի էին ստերով և մանիպուլյացիաներով։

AntiFake.am-ը առանձին-առանձին ներկայացրել է ասուլիսի և հարցուպատասխանի ընթացքում վարչապետի հնչեցրած ստերն ու մանիպուլյացիաները։

Այս հրապարակմամբ ներկայացնում ենք լրատվամիջոցներից մեկի՝ Գարեգին Նժդեհի վերաբերյալ հարցին ի պատասխան` Նիկոլ Փաշինյանի հնչեցրած սխալ հայտարարությունները։

Պատասխանելով Նժդեհի վերաբերյալ հարցին՝ Նիկոլ Փաշինյանը նշել է. «Ես ռուսական մամուլում մի շատ լավ հոդված կարդացի Գարեգին Նժդեհի մասին, որտեղ ասվում էր, որ Գարեգին Նժդեհը ռուսական բանակի սպա է եղել և մասնակցել է Բալկանյան պատերազմին ռուսական բանակի կազմում և պարգևատրվել է։ Եվ այս առումով, կարծում եմ, Ռուսաստանում նույնպես որպես պատմական ֆիգուր և դարասկզբին որպես ռուսական բանակի սպա պետք է վերարժևորեն։…»։

Հարկ է նշել, սակայն, որ Նիկոլ Փաշինյանը սխալվում է։ Գարեգին Նժդեհը մասնակցել է Բալկանյան պատերազմին, սակայն ոչ ռուսական զորքերի կազմում։

Գարեգին Նժդեհի անունը հայտնի է դարձել 1912թ.-ից, երբ սկսվեց Բալկանյան առաջին պատերազմը։ Հայերը Օսմանյան Թուրքիայի դեմ կռվելու համար (հանուն Մակեդոնիայի և Թրակիայի ազատագրության), բուլղարական բանակի կողքին ստեղծեցին կամավորական վաշտ, որի ղեկավարները եղան Նժդեհն ու Անդրանիկը: Բալկանյան պատերազմի ռազմական գործողությունների կողմերն են եղել Օսմանյան Թուրքիան ընդդեմ հունական, բուլղարական, չեռնոգորական և սերբական թագավորությունների։ Այսինքն՝ Ռուսական բանակը անգամ որպես կողմ հանդես չի եկել Բալկանյան պատերազմում։

Այդ պատերազմում Նժդեհը վիրավորվել է: Հայկական վաշտը աչքի է ընկել մի շարք հաղթական կռիվներով։ 1913թ. Գարեգին Նժդեհը զորացրվել է՝ հրաժարվելով մասնակցել բալկանյան ժողովուրդների ներքին կռիվներին:

Իսկ ռուսական բանակի կազմում Նժդեհը կռվել է Առաջին համաշխահային պատերազմի տարիներին։ Այսպես, Առաջին Աշխարհամարտի առաջին փուլում Նժդեհը եղել է Ռուսական կայսրության բանակի կազմում գործող հայկական կամավորական երկրորդ ջոկատի փոխհրամանատարը (գնդի հրամանատարը Դրոն էր)։ Բացի այդ, փոխհրամանատարի պաշտոնում Նժդեհը եղել է հայ-եզդիական առանձին մի զորամասի հրամանատար:

Չնկարագրելով Նժդեհի մասնակցությունը և դերը բոլոր ռազմական գործողություններին` նշենք, որ Նժդեհը 1915թ.-ից մինչև 1916թ. հուլիսի 25-ը մասնակցել է Արևմտյան Հայաստանում տեղի ունեցած մարտերին, որի համար նրան շնորհվել է «Սուրբ Վլադիմիր» 3-րդ կարգի շքանշան, «Սուրբ Աննա» 4-րդ կարգի շքանշան, «Սուրբ Գեորգի» 3-րդ և 2-րդ կարգի խաչ։

Իսկ Բուլղարիայի թագավորության կողմից նրան 1912թ. նոյեմբերի 16-ին արիության համար շնորհվել էր Արիության շքանշան։

Սա առաջին անգամը չէ, երբ Նիկոլ Փաշինյանը խեղաթյուրված է ներկայացնում հայոց պատմության և մասնավորապես Հայաստանի առաջին Հանրապետության պատմության մեջ կարևոր դերակատարում ունեցած Գարեգին Նժդեհի կենսագրության որոշ դրվագները։ Առհասարակ, Նիկոլ Փաշինյանը պարբերաբար կոպիտ սխալներ է անում պատմության էջերին անդրադառնալիս։ Որպես պետությունը ներկայացնող առաջին դեմք Փաշինյանի աշխատակազմը ճիշտ կաներ, որպեսզի ավելի մանրակրկիտ ու բովանդակալից տեղեկություններ նրան տրամադրեր և ավելի լավ պատրաստեր պատմության թեմաներին անդրադառնալիս։

Աղբյուր՝ AntiFake.am