Ինչպես տեղեկացրել էինք նախորդ հրապարակմամբ, Հայաստանում գրանցվող կորոնավիրուսի դեպքերի շեշտակի աճին զուգահեռ` AntiFake.am-ը բազմաթիվ ահազանգեր է ստանում քաղաքացիներից: Մեզ դիմած քաղաքացիներից մեկը պատմել էր, որ իր ընտանիքի տարեց անդամի մոտ, որն ունի մի շարք ուղեկցող քրոնիկ հիվանդություններ, կորոնավիրուս է ախտորոշվել, և վերջինս ջերմում է, ունի երկկողմանի թոքաբորբ:
Քաղաքացին նշել էր, որ իրենք ամբողջ ընտանիքը անորոշության մեջ է, քանի որ ընտանիքի տարեց անդամի մոտ կորոնավիրուսի ախտորոշումից երկու օր անց պարետատնից իրենց հետ կապ չէին հաստատել և չէին ասել, թե երբ են իրենց նույնպես թեստավորելու: Ինքնամեկուսանալու որևէ ցուցում ևս չի տրվել։
Քաղաքացին և իր ընտանիքի անդամները նաև մտահոգ են, որ գուցե իրենցից որևէ մեկից է վարակվել իրենց ընտանիքի տարեց անդամը, քանի որ իրենք երիտասարդ են, իսկ երեխաները` մանկահասակ, որոնց մոտ հիվանդությունը մեծամասամբ անցնում է առանց ախտանիշերի։
Տեղեկացնենք, որ նշված խնդրով AntiFake.am-ին դիմել էին դեռևս մայիսի 27-ին: Պարզելու համար, արդյո՞ք մեզ դիմած քաղաքացին և նրա ընտանիքի անդամները թեստավորվել են, AntiFake.am-ը դարձյալ կապ հաստատեց վերջիններիս հետ:
Վարակակիր անձի ընտանիքի անդամները AntiFake.am-ի հետ զրույցում տեղեկացրին, որ իրենց մինչ այս պահը չեն թեստավորել, նշելով, որ ախտանիշների բացակայության պարագայում թեստավորում չի անցկացվում:
Ստացվում է, որ վարակակիր անձի ընտանիքի անդամները, ովքեր ամենայն հավանականությամբ վարակվել են կորոնավիրուսով, սակայն չունեն որևէ ախտանշան, 9 օր շարունակ չեն թեստավորվել:
Հետաքրքիր կլիներ իմանալ, թե քանի կոնտակտավոր անձ է արժանացել նման վերաբերմունքի և նրանց թեստավորման պարագայում ինչպես կփոխվեր կորոնավիրուսային վիճակագրությունը Հայաստանում:
Կրկին պետք է նշենք, որ օրական մի քանի հարյուրի հասնող կորոնավիրուսով դեպքերը և մեզ դիմած քաղաքացիների օրինակը ցույց է տալիս, որ իշխանությունը կորոնավիրուսի համավարակի դեմ պայքարը թողել է ինքնահոսի։ Հաստատված կորոնավիրուսային վարակվածությամբ անձի ընտանիքի անդամներին 9 օր շարունակ չթեստավորելը նկարագրում է պարետատան կողմից վարակի չվերահսկման հանգամանքի մասին: Բացի այդ, այս ամենը նպաստում է, որ կոնտակտավոր անձինք, որոնք հավանաբար վարակված են, շրջեն քաղաքում, գնան մթերային խանութներ ու այդպիսով` տարածեն վարակը:
Հեղինակ՝ Մարի Ամիրջանյան
Աղբյուր՝ AntiFake.am