Վերջին շրջանում պտտվող այն տեղեկությունները, թե Դավիթ Սանասարյանը կարող է ձերբակալվել, կարծես թե իրականություն են դառնում։
Pastinfo.am-ը փոխանցում է, որ ՊՎԾ աշխատակիցներին վերաբերող քրեական գործով ՊՎԾ պետ Դավիթ Սանասարյանը ներգրավվել է որպես կասկածյալ։ Նրա նկատմամբ խափանման միջոց է ընտրվել՝ ստորագրություն չհեռանալու մասին, իսկ քրեական դատավարության օրենսգրքի համաձայն, խափանման միջոց կիրառվում է դատավարական կարգավիճակ ունեցող անձի՝ կասկածյալի կամ մեղարյալի նկատմամբ։
Pastinfo.am-ի հարցմանն ի պատասխան՝ ԱԱԾ մամուլի կենտրոնից ոչ հերքել են, ոչ հաստատել՝ խոստանալով ավելի ուշ պատասխանել։
Ավելի վաղ հայտնի դարձավ, որ ԱԱԾ-ն քրեական գործ է հարուցել ՀՀ պետական վերահսկողության ծառայության պաշտոնատար անձանց կողմից պաշտոնեական դիրքի չարաշահմամբ պետական գնումների գործընթացին առերևույթ ապօրինի միջամտելու և օրինական ձեռնարկատիրական գործունեության համար խոչընդոտներ ստեղծելու դեպքերի առթիվ՝ ՀՀ քրեական օրենսգրքի 308-րդ հոդվածի 2-րդ մասի և 325-րդ հոդվածի 2-րդ մասի հատկանիշներով։
Սկզբնաղբյուր՝ https://www.pastinfo.am/hy/news/2019/04/16/Դավիթ-Սանասարյանի-նկատմամբ-խափանման-միջոց-է-կիրառվել/822817