Երեկ՝ ապրիլի 18-ին, Կառավարության նիստի ընթացքում ՀՀ վարչապետ Նիկոլ Փաշինյանը, խոսելով գազալցակայանների մասին, նշեց. «Մեր երկրում հիմա համատարած գազալցակայանները հաշվիչ դրամարկղային կտրոն չեն տալիս, բենզալցակայանները չեն տալիս և այլն և էդպես շարունակ»։ Նիկոլ Փաշինյանը հավելեց. «Ինձ ամեն օր ասում են, որ չեն տալիս կտրոն, ուղղակի ցուցադրաբար չեն տալիս։ Ու ընդ որում, էդ բոլոր գազալցակայանների և բենզալցակայանների հետևը կանգնած են կոնկրետ մարդիկ։ Ինչի՞ չեք կարողանում, պարոն Օսիպյան, պարոն Վանեցյան, ինչի՞ չեք էդ հարցը լուծում։ Ինչքա՞ն պետք ա էս հարցը մնա»: Վարչապետը վերջում ընդգծեց. «Տարեք նստացրեք էդ մարդկանց, էս ի՞նչ ձև ա»:
Անհրաժեշտ է նշել, որ հսկիչ դրամարկղային մեքենաների կիրառման պահանջների նկատմամբ վերահսկողությունն իրականացնում է Պետական եկամուտների կոմիտեն և հարկային մարմիններն իրենց համապատասխան ստորաբաժանումներով։ Իսկ թե ՀԴՄ կտրոն չտրամադրելու հետ ինչ առնչություն ունեն ԱԱԾ-ն և Ոստիկանությունը, հայտնի է միայն Նիկոլ Փաշինյանին, ով ցանկացած հարցի «լուծում» պատկերացնում է ասֆալտին պառկեցնելու, պատերին տալու, ծնոտին հարվածելու միջոցով։
Հաշվի առնելով Փաշինյանի «հակակրանքը» գազալցակայանների «տերերի» նկատմամբ, կարելի է ենթադրել, որ այդ հայտարարությունն անուղղակի հանձնարարական էր ԱԱԾ և Ոստիկանության ղեկավարներին՝ ՀԴՄ կտրոններ չտալը դարձնել «կոնկրետ անձանց» հետապնդելու առիթ։