Քիչ առաջ ՀՀ Ազգային ժողովը երկրորդ ընթերցմամբ և ամբողջությամբ ընդունել է Սահմանադրական փոփոխությունների նախագիծը:
Սահմանադրական փոփոխությունների նախագծին կողմ է քվեարկել 89, դեմ` 0, ձեռնպահ` 0 պատգամավոր:
Ազգային ժողովի մեծամասնություն կազմող խմբակցությունը դեմ քվեարկեց նախագիծը Սահմանադրական դատարան ուղարկելու մասին հարցին: Ըստ այդմ` երկրորդ քվեարկությամբ Ազգային ժողովը երկրորդ ընթերցմամբ և ամբողջությամբ ընդունեց Սահմանադրության փոփոխությունների նախագիծը: Նախագծով փոփոխությունների են ենթարկվում Սահմանադրական դատարանի անդամների և նախագահի պաշտոնավարմանը վերաբերող հոդվածները։ Ըստ այդմ, նախատեսվում է, որ դադարեցվում են ՍԴ այն դատավորների լիազորությունները, որոնք պաշտոնավարել են 12 տարուց ավելի: Մնացած դատավորները շարունակում են պաշտոնավարել մինչեւ կլրանա նրանց ՍԴ դատավորի պաշտոնում 12 տարին: Բացի այդ, սահմանվում է, որ ՍԴ դատարանի նախագահի պաշտոնավարումը դադարում է, որից հետո ՍԴ նախագահն ընտրվում է Սահմանադրության 166-րդ հոդվածով սահմանված կարգով, որն իրականացվում է ՍԴ դատարանի դատավորների` սույն հոդվածի 1-ին մասի հիմքով առաջացած թափուր տեղերը համալրելուց հետո:
Ավելի վաղ խորհրդարանական մյուս` «Բարգավաճ Հայաստան» և «Լուսավոր Հայաստան» խմբակցությունները հայտարարել էին, որ չեն մասնակցելու խորհրդարանի արտահերթ նիստին:
Աղբյուր` AntiFake.am