Այսօր՝ հունիսի 30-ին, Ազգային ժողովը արտահերթ նիստ է գումարել, որը կրկին անցավ առանց ընդդիմադիր խմբակցությունների մասնակցության։
Քննարկման էր դրվել «Սահմանադրական դատարանի մասին» ՀՀ սահմանադրական օրենքում փոփոխություններ և լրացումներ կատարելու մասին և «Պաշտոնատար անձանց գործունեության ապահովման, սպասարկման և սոցիալական երաշխիքների մասին» օրենքում փոփոխություն կատարելու մասին օրենքների նախագծերը, ինչպես նաև «Հայաստանի Հանրապետության Ազգային ժողովի 2020 թվականի փետրվարի 6-ի «Սահմանադրության փոփոխությունների նախագիծը հանրաքվեի դնելու մասին» որոշումը ուժը կորցրած ճանաչելու մասին հարցը։
Սուրեն Գրիգորյանի ներկայացմամբ՝ նախագծով առաջարկվում էր փոփոխել Սահմանադրական դատարանի դատավորների թափուր տեղերի համար առաջադրող մարմինների առաջադրման հերթականությունը: Առաջադրումները կատարվելու են հետևյալ հերթականությամբ. կառավարություն, ՀՀ նախագահ, դատավորների ընդհանուր ժողով:
«Սահմանադրական դատարանի մասին» սահմանադրական օրենքում փոփոխություններ և լրացումներ կատարելու մասին, ինչպես նաև «Պաշտոնատար անձանց գործունեության ապահովման, սպասարկման և սոցիալական երաշխիքների մասին» ՀՀ օրենքում փոփոխություն կատարելու մասին օրենքների փաթեթը առաջին ընթերցմամբ ընդունվեց 80 կողմ, 1 դեմ ձայներով: Դեմ քվեարկեց անկախ պատգամավոր Արման Բաբաջանյանը:
Այնուհետև քննարկվեց ԱԺ պատգամավորների մեկ քառորդի կողմից ներկայացված «ՀՀ Ազգային ժողովի 2020թ. փետրվարի 6-ի Սահմանադրության փոփոխությունների նախագիծը հանրաքվեի դնելու մասին» որոշումը ուժը կորցրած ճանաչելու մասին ԱԺ նախագիծը ընդունելու մասին հարցը: Որոշումը ուժը կորցրած ճանաչելու մասին ԱԺ նախագիծն ընդունվեց 81 կողմ ձայներով:
Աղբյուր՝ AntiFake.am