«BBC». Ֆեյսբուքն արգելափակել է տասներկու ծայրահեղ աջ անհատների և կազմակերպությունների, որոնք, այսպես ասած, «ատելություն էին տարածում»։
Արգելափակվողների ցանկում են Բրիտանական ազգային կուսակցությունը և դրա նախկին առաջնորդ Նիք Գրիֆինը, Անգլիական պաշտպանական լիգան և Ազգային ճակատը։
Ֆեյսբուքը դիմել է այդ քայլին, քանի որ այդ գործողություններում ներգրավվածները «բռնության և ատելության առաքելություն» էին ստանձնել:
«Այն անհատներն ու կազմակերպությունները, որոնք հրահրում կամ կոչ են անում մերժել այլ անձանց նրանց այս կամ այն պատկանելիության հիմքով, տեղ չունեն Ֆեյսբուքում»,- ավելացրել է սոցիալական ցանցն իր հայտարարության մեջ։
Արգելափակումը տարածվել է հետևյալ կազմակերպությունների և անհատների վրա.
- Բրիտանական ազգային կուսակցություն և դրա նախկին առաջնորդ Նիք Գրիֆին,
- «Բրիտանիան առաջինը» կուսակցություն, կուսակցության նախագահ Փոլ Գոլդինգ և նախկին փոխնախագահ Ջեյդա Ֆրանզեն,
- Անգլիական պաշտպանական լիգա և դրա հիմնադիր Փոլ Ռեյ,
- «Knights Templar International» և դրա հովանավոր Ջիմ Դոուսոն,
- «Ազգային ճակատ» և դրա առաջնորդ Թոնի Մարտին,
- Նեոնացիստ Ջեք Ռենշոու, որը պատրաստվում էր լեյբորիստ պատգամավորի սպանությանը։
Ֆեյսբուքի մամուլի խոսնակը նշել է, որ այդ անհատներին արգելվում է օգտվել ֆեյսբուքյան ծառայությունից, և ավելացրել, որ այդ խմբերին և անհատներին սատարողները նույնպես չեն օգտվի ֆեյսբուքից:
Բրիտանական պառլամենտի ներքին գործերի հանձնաժողովի նախագահ Իվետ Կուպերը նշել է, որ սա առաջին անհրաժեշտ քայլն է, որը պետք է կատարվի, քանի որ բոլորս էլ գիտենք, թե ինչ սարսափելի հետևանքներ կարող է ունենալ բռնության, ատելության և անօրինականության տարածումը։
Ֆեյսբուքն այս անգամ ֆեյսբուքյան համընդհանուր չափանիշները խախտողների նկատմամբ դիմել է ավելի խիստ գործողության, քան այն, որը կիրառվել էր «Բրիտանիան առաջինը» կուսակցության նկատմամբ մեկ տարի առաջ:
Այդ գործողությունները սկսել են իրականացվել Ֆեյսբուքի կողմից, այն բանից հետո, երբ սոցցանցը հայտարարեց, որ արգելափակելու է սպիտակ նացիոնալիզմի և անջատողականության քարոզը, դրա աջակցությունն ու ներկայացումը իր հիմնական հավելվածում և ինստագրամում։