Մի քանի օր է, ինչ հայ-ադրբեջանական պետական սահմանին Ադրբեջանը դիմում է տարատեսակ սադրանքների: Առկա իրավիճակի ֆոնին քաղաքացիներին, այդ թվում` նաև ԶԼՄ-ներին, պատկան մարմինները շարունակաբար կոչ են անում չտարածել ադրբեջանական պրոպագանդիստական և ապատեղեկատվություն պարունակող լուրեր, չնպաստել հակառակորդի քարոզչական թեզերի տարածմանը: Չնայած բազմաթիվ հորդորներին` կան որոշ լրատվամիջոցներ, որոնք իրենց հրապարակումներով ադրբեջանական թեզերը հայկական մեդիա դաշտ են բերում:
Հատկանշական է, որ այդ լրատվամիջոցները իշխանամերձ շրջանակներից են: Խոսքը, օրինակ, վարչապետ Փաշինյանի նախկին խորհրդական Արսեն Խառատյանի հիմնադրած և նրա ղեակավարած «Ալիք մեդիայի» մասին է: Տեղեկացնենք, որ այս լրատվամիջոցը իր գործունեությունը ծավալում է վրացական «Բաց հասարակության հիմնադրամների» (Սորոսի հիմնադրամ) ֆինանսական աջակցությամբ: Բացի «Ալիք մեդիայից»` այս օրերին ադրբեջանական պրոպագանդայի տարածելու գործին միացել են ՀՖՖ նախագահ Արմեն Մելիքբեկյանին պատկանող «epress.am» լրատվականը և ԱՄՆ պետդեպարտամենտից ֆինանսավորվող «Ազատություն ռադիոկայանը»:
«Ալիք մեդիան» «Հայկական կողմի կրակոցներից ադրբեջանցի խաղաղ քաղաքացի է զոհվել. վրացական մեդիայի անդրադարձը» վերտառությամբ հրապարակում էր կատարել: «Ալիք մեդիայի» հոդվածում ադրբեջանական կողմի սադրանքները ներկայացվել են որպես «Հայաստանի և Ադրբեջանի սահմանին տեղի ունեցած միջադեպ»: Հղում կատարելով ադրբեջանական APA գործակալության «տեղեկատվությունը» տարածած Interpressnews-ին՝ «Ալիք մեդիան» հայտնել է, որ «հայկական կողմի հրետանային կրակի հետևանքով քաղաքացիական անձ է զոհվել»: ««Թշնամու սադրանքի զոհ է դարձել» 1944-ին ծնված տղամարդ, որը Աղդամ գյուղի բնակիչ էր»,- մեջբերել է «Ալիք մեդիան»: Համացանցում բարձրացված աղմուկից հետո լրատվականը փոխել է հոդվածի վերնագիրը:
Հետաքրքիր է, որ Արսեն Խառատյանը միայն ընդունել է հոդվածի վերնագրի խնդրահարույց լինելու հանգամանքը:
ՀՖՖ նախագահ Արմեն Մելիքբեկյանին պատկանող «epress.am»-ը մշտապես աչքի է ընկել հակահայկական նյութերի տարածմամբ:
Օրերս «epress.am»-ում հրապարակվել են «ՊՆ-ն մեղադրում է Բաքվի կոլեգաներին կենդանի վահան օգտագործելու մեջ», «Ադրբեջանը հայտնում է խաղաղ բնակչի զոհվելու մասին» և «Ադրբեջանցիների շրջանում տարածում է գտնում #եսպատերազմչեմուզում հեշթեգը» վերնագրերով և բացառապես թշնամու շահերը սպասարկող հոդվածները (1, 2, 3):
Տեղեկացնենք, որ «epress.am»-ը 2016թ. ապրիլյանի օրերին նույնպես զբաղված էր ադրբեջանական պրոպագանդայով, ապատեղեկատվության տարածմամբ, հակառուսական տրամադրությունների ձևավորմամբ: Բացի այդ, ՀՖՖ նախագահ Արմեն Մելիքբեկյանին պատկանող կայքը քարոզում էր հայ ու ադրբեջանցի զինվորների եղբայրացման հնարավորությունների մասին: Մի քանի օրինակ ներկայացնում ենք ստորև (1, 2, 3):
Հիշեցնենք, որ 2016թ. Ապրիլյան պատերազմի օրերին ադրբեջանական պրոպագանդայով էր զբաղվում նաև ներկայումս ՀՀ ԱԺ փոխնախագահ Ալեն Սիմոնյանի խմբագրած «araratnews.am»-ը:
Այս օրերին ադրբեջանական պրոպագանդայի տարածմանն է լծված նաև «Ազատություն ռադիոկայանը», որը օրինակ, հղում կատարելով «Reuters» գործակալությանը՝ հրապարակել է ադրբեջանցի զինվորի թաղման կադրերը:
Ինչպես 2016 թվականի Ապրիլյան քառօրյա պատերազմի օրերին, այնպես էլ այսօր վերոնշյալ լրատվականները շարունակում են իրենց հակահայկական գործելաոճը, նպաստում են ադրբեջանական թեզերի` հայկական լրատվական դաշտ ներթափանցելուն և վերջինիս պրոպագանդայի հաջողությանը: Հետաքրքիր է, թե ինչպիսին է իշխանությունների վերաբերմունքը այս դեպքում, երբ պետության «ներքին թշնամիները» իրենց իսկ թիմակիցների և համախոհների կողմից ղեկավարվող լրատվամիջոցներն են:
AntiFake.am-ը գործընկեր ԶԼՄ-ներին կոչ է անում Հայաստանի և Արցախի համար վճռական այս օրերին հրապարակել բացառապես Հայաստանի Հանրապետության և Արցախի Հանրապետության իրավասու մարմինների կողմից տրամադրված պաշտոնական տեղեկատվությունները՝ ադրբեջանական քարոզչական, մանիպուլյատիվ և կեղծ տեղեկությունների հնարավոր ծուղակներից զերծ մնալու համար։
Հեղինակ՝ Մարի Ամիրջանյան
Русская версия статьи.
Աղբյուր՝ AntiFake.am