Այսօր` հուլիսի 16-ին, սոցիալական ցանցերում լուսանկար տարածվեց, որտեղ երևում էր Նիկոլ Փաշինյանը` հիվանդանոցում բուժում ստացող զինծառայողի ճակատը համբուրելիս:
Այս լուսանկարով կիսվել է նաև այս օրերին հայ-ադրբեջանական պետական սահմանին առկա ռազմական գործողությունների ընթացքում Ճգնաժամային տեղեկատվական կենտրոնի համակարգող, ՊՆ նախկին մամուլի խոսնակ Արծրուն Հովհաննիսյանը:
Հենց Արծրուն Հովհաննիսյանի կողմից տարածվելուց հետո էլ նկարը հայտնվեց մի քանի լրատվականների էջերում, ինչպիսիք են` asekose.am, auroranews.am , 1in.am և այլն:
Այնուհետև, Արծրուն Հովհաննիսյանը խմբագրել է գրառումը` նշելով, որ «նկարը հին է, բայց խորհրդանշական»:
Լուսանկարը տարածել է նաև «Баграмян 26» տելեգրամյան ալիքը:
Սակայն պետք է նշենք, որ լուսանկարը արված է դեռևս 2018 թվականի մայիսի 17-ին, երբ վարչապետ Նիկոլ Փաշինյանը այցելել էր ՊՆ կենտրոնական կլինիկական զինվորական հոսպիտալ: Վարչապետը տեսակցել է մայիսի 13-ին հակառակորդի կողմից արձակված կրակոցից հրազենային ծանր վիրավորում ստացած ՊԲ զինծառայող Շամխալ Սեյրանի Պետրոսյանին:
Այցի լուսաբանումը արվել է ՊՆ պաշտոնական կայքի, վարչապետի պաշտոնական կայքի և ԶԼՄ ներկայացուցիչների կողմից:
Русская версия статьи.
Աղբյուր` AntiFake.am