Հայաստանում վերջին երկու տարիների ընթացքում ինքնասպանությունների թիվը զգալիորեն ավելացել է: ՀՀ վիճակագրական կոմիտեից AntiFake.am-ին հայտնել են, որ Հայաստանի Հանրապետությունում 2018թ. գրանցվել է ինքնասպանության 179 և ինքնասպանության փորձերի 427 դեպք: Մասնավորապես, 2018թ. հունվար-հունիս ամիսներին գրանցվել է ինքնասպանության 96 դեպք, հուլիս-դեկտեմբեր ամիսներին` 83 դեպք: 2018թ. հունվար-հունիս ամիսներին գրանցվել է ինքնասպանության փորձի 241 դեպք, հուլիս-դեկտեմբեր ամիսներին` 186 դեպք:
2019թ. հունվար-հունիս ամիսներին գրանցվել է ինքնասպանության 86 դեպք, հուլիս-դեկտեմբեր ամիսներին` 67 դեպք: Ինքնասպանությունների փորձերի թիվն էլ 2019թ. հունվար-հունիս ամիսներին եղել է 267, հուլիս-դեկտեմբեր ամիսներին՝ 193 դեպք: Ընդհանուր առմամբ` գրանցվել է ինքնասպանության 153 և ինքնասպանությունների փորձերի 460 դեպք:
Ըստ վիճակագրական կոմիտեի տվյալների՝ Հայաստանի Հանրապետությունում ինքնասպանություն և ինքնասպանության փորձ կատարածների մեծ մասը գործազուրկներն են:
Ինքնասպանությունների և ինքնասպանությունների փորձերի վերաբերյալ AntiFake.am-ին տվյալներ են փոխանցվել նաև ՀՀ Արտակարգ իրավիճակների նախարարության կողմից: Համաձայն մեզ փոխանցված տվյալների՝ 2018թ. մայիսից մինչև 2020թ. հունիսի 30-ն ընկած ժամանակահատվածում ԱԻՆ փրկարար ծառայության ճգնաժամային կառավարման ազգային կենտրոնում հաշվառված ինքնասպանությունների թիվը եղել է 413, ինքնասպանությունների փորձերինը՝ 1119: Մասնավորապես, 2018թ. մայիսի 1-ից դեկտեմբերի 31-ն ընկած ժամանակահատվածում գրանցվել է ինքնասպանության 153 դեպք, 2019թ.` 176 դեպք, 2020թ. առ հունիսի 30-ը՝ 84 դեպք: Իսկ 2018թ. մայիսի 1-ից դեկտեմբերի 31-ն ընկած ժամանակահատվածում գրանցվել է ինքնասպանության փորձի 358 դեպք, 2019թ.` 502 դեպք, 2020թ. առ հունիսի 30-ը՝ 259 դեպք:
Համեմատության համար կարող ենք նշել, որ Հայաստանի Հանրապետությունում 2017թ. ընդհանուր առմամբ գրանցվել է ինքնասպանության և ինքնասպանության փորձերի 562 դեպք, ինչը համեմատաբար ավելի ցածր է, քան 2018թ. և 2019թ. գրանցված դեպքերը:
Հեղինակ՝ Մարի Ամիրջանյան
Աղբյուր` AntiFake.am