Երեկ` օգոստոսի 13-ին, Երևանի քաղաքապետարանի պաշտոնական կայքում հրապարակվել է Արթուր Մեսչյանին սեփական դիմումի հիման վրա Երևանի գլխավոր ճարտարապետի պաշտոնից ազատելու մասին որոշումը: Որոշումը ստորագրվել է օգոստոսի 12-ին:
Հետաքրքիր է, որ հայկական լրատվականներում Արթուր Մեսչյանի ազատման հրամանը տարածվեց երկու ձևով:
Լուրը առավել վաղ տարածած լրատվականները, հղում անելով Երևանի քաղաքապետարանի պաշտոնական կայքում տեղադրված որոշմանը, նշում էին, որ քաղաքապետ Հայկ Մարությանն է ստորագրել որոշումը:
Օրինակ, «Sputnik Արմենիա» լրատվական գործակալությունը, որը լուրը տեղադրել է օգոստոսի 13-ին ժամը 18:24-ին, փաստում է. «Երևանի քաղաքապետ Հայկ Մարությանը Երևանի գլխավոր ճարտարապետ Արթուր Մեսչյանին պաշտոնից ազատելու որոշում է կայացրել։… Մարությանը փաստաթուղթը ստորագրել է օգոստոսի 12-ին։ Սա փոքր–ինչ տարօրինակ է, քանի որ այդ ընթացքում քաղաքապետը գտնվել է արձակուրդում...»:
Մյուս լրատվականը` «Փաստինֆո»-ն, որը լուրը տեղադրել է 18:31-ին, գրում է. «Արձակուրդի մեջ գտնվող քաղաքապետն աշխատանքից ազատել է Երևանի գլխավոր ճարտարապետին...»` նշելով, որ Հայկ Մարությանը օգոստոսի 11-ից, ինչպես հայտարարել է վերջինիս մամուլի խոսնակը, մեկնում է արձակուրդի:
Մեկ այլ լրատվական` «168.am»-ը, լուրը տեղադրելով 18:55-ին, նշում է. «Երևանի քաղաքապետ Հայկ Մարությանը Երևանի գլխավոր ճարտարապետ Արթուր Մեսչյանին զբաղեցրած պաշտոնից ազատելու որոշում է կայացրել:…Ի դեպ, որոշումը Հայկ Մարությանը ստորագրել է օգոստոսի 12-ին, այսինքն՝ իր արձակուրդի օրերին»:
Նույնիսկ նորահայտ իշխանական լրատվամիջոցներից freenews.am կայքը, որը պատկանում է ՀՀ Ազգային ժողովի փոխնախագահ Ալեն Սիմոնյանի կնոջը, գրել է` «Երևանի քաղաքապետ Հայկ Մարությանը Երևանի գլխավոր ճարտարապետ Արթուր Մեսչյանին զբաղեցրած պաշտոնից ազատելու որոշում է կայացրել»:
Այլ լրատվամիջոցներ, որոնցից է նաև «Արմենպրես» պետական լրատվական գործակալությունը, համեմատաբար ավելի ուշ տեղադրելով լուրը, հղում են արել փաստաթղթին, որը ստորագրված է քաղաքապետի առաջին տեղակալ, քաղաքապետի պաշտոնակատար Հրաչյա Սարգսյանի կողմից:
Երևանի քաղաքապետարանի պաշտոնական yerevan.am կայքում տեղադրված որոշումը ստորագրված է քաղաքապետի առաջին տեղակալ, քաղաքապետի պաշտոնակատար Հրաչյա Սարգսյանի կողմից:
Այս դեպքում հարց է առաջանում. արդյո՞ք հրապարակված որոշումը նախապես ստորագրել է Հայկ Մարությանը` գտնվելով արձակուրդում, ինչն անօրինական է, սակայն ԶԼՄ-ների հրապարակումից հետո փաստաթուղթը փոփոխվել է և հրապարակվել քաղաքապետի տեղակալ Հրաչյա Սարգսյանի անունով:
Լրատվականների հրապարակումները, որտեղ նշվում է, որ Երևանի գլխավոր ճարտարապետ Արթուր Մեսչյանին աշխատանքից ազատելու որոշումը օգոստոսի 12-ին ստորագրել է արձակուրդում գտնվող քաղաքապետը՝ ստորև.
Հեղինակ՝ Մելինե Հայրապետյան
Աղբյուր՝ AntiFake.am