Այսօր՝ օգոստոսի 17-ին, տեղի է ունեցել «Մեդիա պաշտպան» նախաձեռնության «Մեդիա վահան 2020» մրցանակաբաշխությունը։ Միջոցառման ընթացքում ներկայացվել են 9 անվանակարգեր՝ «Լավագույն լրատվական», «Ամենաքննարկվող քաղաքական գործիչ», «Ամենասկանդալային քաղաքական գործիչ», «Ամենադրական հանրային գործիչ», «Լավագույն ֆոտոլրագրող», «Լավագույն լրագրող», «Լավագույն հետաքննող լրատվական», «Կայուն զարգացող լրատվական», «Լավագույն հեռուստամեկնաբան»։
«Կայուն զարգացող լրատվական» անվանակարգում առաջադրված 3 լրատվականներից հաղթող է ճանաչվել «AntiFake.am»-ը։
«Մեդիա պաշտպան» նախաձեռնության ներկայացուցիչ Սերգեյ Չամանյանը, ներկայացնելով «Կայուն զարգացող լրատվական» անվանակարգը, նշեց, որ այն «Լավագույն մեդիա» անվանակարգի աճող բջիջն է։ «Մենք ունեինք մի քանի լրատվամիջոց, որոնց հետևում էինք նույնիսկ մեկ տարի և ավելի, որոնք փոքր՝ 2-3 հոգանոց թիմից աճեցին ու հասցրին իրենց աշխատանքը այն մակարդակի, որ իրենց մասին այժմ խոսում են նույնիսկ փողոցներում, ոչ միայն խոհանոցներում, այլ փողոցներում. մարդիկ կիսվում են, շփվում են՝ արդյո՞ք դու տեսար, արդյո՞ք դու լսել ես և այլն։ Այս անվանակարգում հաղթել է AntiFake.am-ը», - հայտարարեց Չամանյանը։
AntiFake.am կայքի խմբագիր Մելինե Հայրապետյանը, ընդունելով մրցանակը, շնորհակալություն հայտնեց. «Սա մեր առաջին մրցանակն է շուրջ երկու տարվա ընթացքում մեր գործունեության արդյունքում։ Հույս ունենք, որ շատ հետևորդներ կունենանք և մրցանակներից պակաս չենք լինի», - ասաց Հայրապետյանը։
AntiFake.am-ի խմբագրությունը շնորհակալություն է հայտնում «Մեդիա պաշտպան» նախաձեռնությանը գործունեության վերաբերյալ գնահատականի համար, ինչպես նաև մեր ընթերցողներին, որոնք ոգեշնչում են մեզ։
Աղբյուր՝ AntiFake.am