Վերջին օրերին Հանրային հեռուստաընկերությունը գործի է դրվել դատական իշխանությունը հեղինակազրկելու և հասարակության ներսում ատելություն սերմանելու նպատակով:
Մայիսի 23-ի և 24-ի լրատվական թողարկումների ընթացքում անդրադարձ է կատարվել ՀՀ դատական իշխանությանը, այդ թվում՝ Սահմանադրական դատարանին: Սա գործադիր և օրենսդիր իշխանությունների կողմից դատական իշխանության դեմ իրականացվող արշավի և հակաքարոզի շարունակությունն է:
Ըստ ռեպորտաժներից մեկի՝ դատական իշխանությունը կոռումպացված է և միշտ ենթարկվել է օրվա իշխանություններին: Այս ռեպորտաժը ցուցադրվել է ԱԺ-ում նախատեսված անցումային արդարադատության հանրային լսումներն ուղիղ եթեր հեռարձակելուց անմիջապես առաջ:
Թողարկումներից մեկը «նվիրված էր» ՍԴ նախագահ Հրայր Թովմասյանին, որտեղ խոսվում էր վերջինիս` Սահմանադրական դատարանի նախագահի պաշտոնում Սահմանադրության խախտմամբ նշանակվելու մասին:
Իսկ արդեն Պետրոս Ղազարյանի հետ հարցազրույցում ԱԺ «Իմ քայլը» խմբակցության պատգամավոր Թագուհի Թովմասյանը կասկածի տակ է դրել Գագիկ Հարությունյանի` որպես ԲԴԽ նախագահի լեգիտիմությունը:
Հարկ է նշել, որ թե՛ ռեպորտաժով, թե՛ հարցազրույցով խնդիրը ներկայացվում է միակողմանիորեն: Հանրային հեռուստաընկերությունը դատարաններին մեղադրում է իշխանություններին ենթարկվելու մեջ, սակայն այս դեպքով, և ոչ միայն, Հանրային հեռուստատեսությունն ինքն է հանդիսանում օրվա իշխանությունների պրոպագանդան իրականացնողը։
Ժողովրդավարական պետությունները հակված են դատական իշխանության հեղինակությունը և վստահության մակարդակը բարձրացնելուն։
Մինչդեռ Հայաստանի Հանրապետությունում Հանրային հեռուստաընկերությունն օգտագործվում է իշխանությունների օրակարգը սպասարկելու և դատական իշխանության նկատմամբ հակաքարոզ իրականացնելու համար։Ինչը խախտում է «Հեռուստատեսության և ռադիոյի մասին» ՀՀ օրենքի մի շարք սկզբունքներ։
Հեղինակ՝ Աիդա Ստեփանյան