Այսօր` սեպտեմբերի 17-ին, ՀՀ Ազգային ժողովում Կառավարության հետ հարցուպատասխանի օրն էր: Կառավարության անդամները` վարչապետ Նիկոլ Փաշինյանի գլխավորությամբ, պատասխանում են պատգամավորների հարցերին:
Ինչպես անցած երկու տարիների ընթացքում, այնպես էլ այս անգամ Նիկոլ Փաշինյանի ելույթները առանց էպատաժների չեն անցնում: Բազմաթիվ հանճարեղ մտքերի ու գաղափարների կողքին` ՀՀ վարչապետը այս անգամ էլ հայտարարեց, որ Բելառոսը հանդիսանում է Եվրոպայի խորհրդի (ԵԽ) անդամ:
Պետք է նշել, որ Բելառուսը Եվրոպայի խորհրդի անդամ պետություն չի հանդիսանում:
Նիկոլ Փաշինյանը, պատասխանելով ԱԺ «Լուսավոր Հայաստան» խմբակցության պատգամավորի հարցին, բառացիորեն ասաց. «Հետաքրքիր է` ինչ նկատի ունեք, երբ որ ասում եք` Հայաստանը իրեն համարում է եվրոպական ընտանիքի մաս: Բելառուսն էլ ա իրան համարել եվրոպական ընտանիքի մաս էնքանով, որքանով, Եվրոպայի խորհրդի անդամ ա, ԵԱՀԿ-ի անդամ ա, Արևելյան գործընկերության անդամ ա: Հայաստանը նաև Եվրասիական տնտեսական միության անդամ է, նաև ԱՊՀ անդամ է, նաև ՀԱՊԿ անդամ է: Եվ էդտեղ… որևէ պետություն առաջին հերթին առաջնորդվում է իր ազգային շահերով և հետաքրքրություններով»:
Երբ նրա այս հայտարարությունից հետո համացանցում բուռն քննարկումներ սկսվեցին, Նիկոլ Փաշինյանը ելույթը տեղադրեց ֆեյսբուքյան իր էջում` հատուկ շեշտելով. «Ճշգրտում. Բելառուսը չի հանդիսանում ԵԽ անդամ, ինչպես նշել եմ տեսանյութում»:
Ստացվում է, որ ՀՀ վարչապետ Նիկոլ Փաշինյանը ոչ միայն չգիտի, որ Բելառուսը ԵԽ անդամ պետություն չէ, այլ սխալը ուղղելու փոխարեն` հրապարակային ստում է` ասելով, որ նման բան չի ասել: Նա ոչ միայն չի ասել, որ «Բելառուսը չի հանդիսանում ԵԽ անդամ», այլ պնդել է լրիվ հակառակը: Կարելի է պարզապես զարմանալ, թե ինչ համառությամբ է Նիկոլ Փաշինյանը շարունակում հերքել իր հրապարակային խոսքը:
Աղբյուր՝ AntiFake.am