ՌԴ արտգործնախարար Սերգեյ Լավրովը ՄԱԿ-ի գլխավոր քարտուղար Անտոնիո Գուտերեշի հետ քննարկել է Ուկրաինայում և Մերձավոր Արևելքում տիրող իրավիճակը և հացահատիկային գործարքի իրականացման ընթացքը: Այս մասին հաղորդում է «Արմենպրես»-ը՝ վկայակոչելով ՌԴ արտգործնախարարության տարածած հաղորդագրությունը:
Ըստ հաղորդագրության տեքստի՝ հատուկ ուշադրություն է դարձվել 2022 թ.-ի հուլիսին Ստամբուլյան պայմանավորվածությունների իրականացման ընթացքին՝ կապված ուկրաինական պարենամթերքի արտահանման, ինչպես նաև ՌԴ-ի գյուղատնտեսական ապրանքների և պարարտանյութերի՝ համաշխարհային շուկա արտահանման հետ:
«Լավրովն ընդգծել է, որ չնայած նշված համաձայնագրերի փոխկապակցված փաթեթային բնույթին, ուկրաինական հացահատիկի կայուն մատակարարումների ֆոնին Ռուսաստանի և ՄԱԿ-ի քարտուղարության միջև ստորագրված հուշագրի իրագործման հարցում դեռևս կոնկրետ տեղաշարժեր չկան», - նշվում է ՌԴ արտաքին քաղաքական գերատեսչության հայտարարությունում։
Լավրովը նաև ուշադրություն է հրավիրել այն բանի վրա, որ ԱՄՆ-ն չի կատարել ՄԱԿ-ի կենտրոնական կառույցների մասին համաձայնագրի շրջանակներում իր պարտավորությունները, մասնավորապես՝ ռուսաստանցի լրագրողներին վիզաներ չի տրամադրել ՄԱԿ-ի նիստերի լուսաբանման համար, սահմանափակումներ է մտցրել ՌԴ դիվանագետների տեղաշարժի համար:
ՄԱԿ-ի Անվտանգության խորհրդի նախագահությունն ապրիլին անցել է Ռուսաստանին: Սերգեյ Լավրովը Նյու Յորքում նախագահել է ՄԱԿ-ի ԱԽ նիստը, որի ընթացքում ԱՄՆ-ին մեղադրել է այն բանում, որ Վաշինգտոնը խաթարում է աշխարհում անվտանգության ճարտարապետությունը, և որ Կիևի վարչակարգը չի ներկայացնում Ուկրաինայի ժողովրդի շահերը:
Ըստ CNN-ի՝ արևմտյան երկրների մի շարք ներկայացուցիչներ քննադատել են Լավրովի ելույթը՝ դատապարտելով, որ Ռուսաստանի կողմից պատերազմի արդարացումը: ԵՄ երկրները ՄԱԿ-ի ԱԽ-ի հանդիպումից առաջ համատեղ հայտարարություն էին տարածել՝ դատապարտելով Ռուսաստանի գործողություններն Ուկրաինայում և քննադատելով Լավրովի ներկայությունը նիստին:
%20(1280%20%C3%97%20300%20px).png)
Աղբյուր՝ AntiFake.am