Երեկ՝ հուլիսի 25-ին, կառավարությունը նիստի ընթացքում գերակա ոլորտում իրականացվող ներդրումային ծրագրի շրջանակներում արտոնություն է տվել «Արտ Գլոբալ» ՍՊ ընկերությանը։
Ընկերության կողմից ներմուծվող հումքն օգտագործվելու է թղթե և ստվարաթղթե արտադրատեսակների արտադրության մեջ։ Ծրագրի շրջանակներում նախատեսվում է իրականացնել 250 մլն ՀՀ դրամի ներդրում և ստեղծել 20 նոր աշխատատեղ՝ 150,000 դրամ միջին աշխատավարձով։ Արտոնություն ստանալու համար ներկայացված ապրանքների արժեքը կազմում է 246 մլն 780 հազար դրամ, իսկ մաքսատուրքի ազատման արտոնությունը կազմում է 12 մլն 339 հազար դրամ։
Հատկանշական է այն փաստը, որ 2016-2019թթ․ «Արտ Գլոբալ» ՍՊԸ-ի փոխտնօրենը եղել է ՀՀ ԱԺ «Իմ Քայլը» խմբակցության պատգամավոր Արտաշես Պետրոսյանը։
Երեկ՝ հուլիսի 25-ին, Factor.am-ը հոդված էր հրապարակել« Կառավարությունն արտոնություն տվեց «Իմ քայլի» պատգամավորի ընտանիքին պատկանող բիզնեսին» վերնագրով, սակայն ո րոշ ժամանակ անց հոդվածը հեռացվել է։
Մի շարք լրատվականներ Factor.am-ի հոդվածը տեղադրել են իրենց կայքում և հղում արել Factor.am-ին։
Ըստ Factor.am-ի տեղեկությունների, «Արտ Գլոբալ» ՍՊԸ-ն պատկանում է Արտաշես Պետրոսյանի ընտանիքին, և նախքան օրենսդիրում աշխատելը նա եղել է «Արտ Գլոբալ» ՍՊԸ-ի փոխտնօրենը, ով իր հարցազրույցներում չի հերքել, որ «Արտ Գլոբալ» ՍՊԸ-ն պատկանում է իր ընտանիքին։
Factor.am-ի հոդվածի հեռացման մասին հրապարակում էր արել ռազմական փորձագետ Կարեն Վրթանեսյանը, ում այն հարցադրմանը, թե ինչու է հեռացվել հրապարակումը, Factor.am-ի լրագրող և այդ հրապարակման հեղինակ Նարեկ Կիրակոսյանը պատասխանել է, որ նյութում անուշադրության հետևանքով վրիպակ է եղել, և հայցել է ընթերցողների ներողամտությունը։ Սակայն մինչ այս պահը կայքում նյութը այդպես էլ չի հրապարակվել «առանց վրիպակների» տարբերակով։
Ավելի ուշ թեմային անդրադարձել էր իմքայլական պատգամավոր Արտաշես Պետրոսյանը, ով ասել է, որ «Արտ գլոբալ»-ում աշխատել է որպես փոխտնօրեն, և ուրիշ կապ չի ունեցել այդ ՍՊԸ-ի հետ, ըստ այդմ հերքելով իր և ընտանիքի կապը «Արտ գլոբալ» ՍՊԸ-ի հետ։
Ուստի Factor.am-ը հրապարակել է ապատեղեկատվություն պարունակող հոդված և, ինչպես Նարեկ Կիրակոսյանն էր ասել, «վրիպակների ուղղմամբ» նոր հոդված մինչ այս պահը լրատվական կայքում չի հրապարակվել։
Հարկ է նշել, որ Factor.am լրատվականը առաջին անգամը չէ, որ ապատեղեկատվություն է հրապարակում։ Բացի այդ Factor.am լրատվականի լրագրող և վերը նշված հոդվածի հեղինակ Նարեկ Կիրակոսյանը աշխատանքային ժամից դուրս հրահանգավորված կերպով մանիպուլացիաներով է զբաղված, ինչը ամեն ինչ ասում է կայքի կողմից վարվող քաղաքականության մասին։
Հեղինակ՝ Մարի Ավագյան