Կառավարությունն օրեր առաջ ռազմական դրության մասին որոշման մեջ փոփոխություններ կատարելու որոշում է ընդունել: Փոփոխությունները վերաբերվում են նաև լրատվական դաշտին և ենթադրում են, որ չի կարելի քննադատել կամ կասկածի տակ դնել պաշտոնյաների խոսքը` կապված ռազմական գործողությունների և վարվող քաղաքականության հետ։ Ընդունված որոշումը մի շարք քննադատությունների է արժանացել. որոշ լրատվամիջոցների ներկայացուցիչներ և հանրային այլ անձինք հրավիրվել են ոստիկանություն, կազմվել են տարատեսակ ակտեր:
Խոսքի ազատության սահմանափակումները կարծես թե շրջանցում են իշխանական լրատվամիջոցներին՝ «Ազատություն» Ռ/Կ-ին ու «Հայկական ժամանակին»: Այս լրատվականները ակտիվորեն տարածում են ադրբեջանական լրահոսը, մեծ թվով ապատեղեկատվություն պարունակող նյութեր, որոնք կասկածի տակ են դնում Հայաստանի Հանրապետության պաշտպանության նախարարության, Արցախի Հանրապետության պաշտպանության բանակի և այլ պետական կառույցների պաշտոնական հայտարությունները:
Ստորև առանց մեկնաբանության ներկայացնում ենք «Ազատություն» Ռ/Կ-ի և «Հայկական ժամանակի»` ադբեջանական պրոպագանդային նպաստող հրապարակումները:
«Բաքուն պնդում է, թե պահպանում է հրադադարը»
«Ալիև. Թուրքիան անպայման պետք է ներկա լինի ԼՂ հակամարտության կարգավորման գործընթացում»
«Բաքուն խզելու է կապերը Արցախի անկախությունը ճանաչող երկրների հետ»
«Ալիևը պնդում է, որ Ֆրանսիան չեզոք է Ղարաբաղի հարցում»
Պատերազմական իրավիճակում վերոնշյալ իշխանական լրատվամիջոցների՝ Կառավարության կողմից ընդունված որոշմանը հակասող գործողությունները մինչ օրս չեն հայտնվել իրավապահների ուշադրության կենտրոնում` ի տարբերություն «ոչ իշխանահաճո» լրատվամիջոցների և անձանց բազմաթիվ «խնդրահարույց» գրառումների, ինչի կապակցությամբ հրավիրում ենք ՀՀ ոստիկանության ուշադրությունը:
Հեղինակ՝ Մարի Ամիրջանյան
Աղբյուր՝ AntiFake.am