ԱՄՆ-ում ՀՀ դեսպան Վարուժան Ներսեսյանը հարցազրույց է տվել ամերիկյան «The Hill» պարբերականին:
Դեսպանը նշել է, որ Միացյալ Նահանգները պետք է դադարեցնեն Ադրբեջանին տրվող ռազմական օժանդակությունը և ավելի մեծ ճնշում գործադրեն Թուրքիայի վրա` կանգնեցնելու նրա միջամտությունը Լեռնային Ղարաբաղի հակամարտության մեջ:
Ներսեսյանը հայտնել է նաև ՀՀ արտգործնախարար Զոհրաբ Մնացականյանի և ԱՄՆ պետքարտուղար Մայքլ Պոմպեոյի մասնակցությամբ այս ամիս տեղի ունենալիք գագաթնաժողովի մասին: Հայաստանի և Միացյալ Նահանգների ամենամյա ռազմավարական երկխոսության շրջանակներում անցկացվելիք հանդիպումը նոր հրատապ բնույթ է ստանում` կրակի դադարեցման ապահովման ջանքերի և շաբաթներ շարունակվող տասնյակ զոհերի, հարյուրավոր վիրավորների և տասնյակ հազարավոր տեղահանվածների պատճառ դարձած ռազմական գործողությունների ֆոնին:
Վարուժան Ներսեսյանը հայտնել է որ Հայաստանի արտգործնախարարությունը և ԱՄՆ պետդեպարտամենտը առաջիկայում պաշտոնապես կհայտարարեն գալիք հանդիպման մասին:
«Այս պահին մենք նախապատրաստում ենք արտգործնախարարի` Վաշինգտոն այց», - ասել է դեսպանը:
Ներսեսյանը նշել է, որ գնահատում է պետքարտուղար Պոմպեոյի հայտարարությունը, որտեղ վերջինս նշում է, որ Թուրքիան աջակցում է Ադրբեջանին այս պատերազմում: Այնուամենայնիվ, այս փուլում պետք է ոչ միայն հայտարարություններ արվեն, այլ հստակ քայլեր ձեռնարկվեն: «Առաջին հերթին Թրամփի վարչակազմը պետք է ստիպի Թուրքիային անհապաղ դադարեցնել իր ագրեսիան ընդդեմ Լեռնային Ղարաբաղի», - նշել է դեսպան Ներսեսյանը:
Աղբյուր՝ AntiFake.am