Իսրայելի զինված ուժերը գիշերն արշավ են իրականացրել Հորդանան գետի արևմտյան ափին՝ սպանելով 16-ամյա մի տղայի։ «Արմենպրես»-ի փոխանցմամբ՝ այս մասին հաղորդում է Reuters գործակալությունը։
Պաղեստինյան ազգային վարչակազմի մայրաքաղաք Ռամալլայում իրականացված արշավն, ըստ պաղեստինյան աղբյուրների, խոշորագույնն է վերջին մի քանի տարիների ընթացքում։
Ըստ ականատեսների՝ իսրայելական ուժերը տասնյակ զինվորական մեքենաներով մտել են քաղաք, որը Պաղեստինյան ազգային վարչակազմի նախագահ Մահմուդ Աբբասի նստավայրն է։
Պաղեստինյան WAFA գործակալությունը հաղորդում է, որ իսրայելական ուժերը ներխուժել են Ռամալլայի արևելքում գտնվող Ամարի ճամբար, բախումներ են սկսվել, որի ժամանակ զոհվել է 16-ամյա Մուստաֆա Աբու Շալբակը։
Բացի այդ, WAFA-ի հրապարակման համաձայն, իսրայելական ուժերը լայնածավալ գործողություններ են իրականացրել Հորդանան գետի արևմտյան ափի մի շարք այլ քաղաքներում՝ ձերբակալելով 55 մարդու։ Ընդհանուր առմամբ, հոկտեմբերի 7-ին Իսրայելի և պաղեստինյան ՀԱՄԱՍ արմատական շարժման միջև Գազայի հատվածում ընթացող ռազմական գործողությունների ընթացքում Հորդանան գետի արևմտյան ափին ձերբակալվածների թիվը հասել է շուրջ 7400-ի։
Գազայի հատվածում ընթացող պատերազմին զուգահեռ Հորդանան գետի արևմտյան ափին բռնությունների թիվն աճել է․ առնվազն 400 պաղեստինցի սպանվել է իսրայելցի զինվորների և վերաբնակների հետ բախումների ժամանակ։
%20(1280%20%C3%97%20300%20px).png)