.png)
Այսօր ԱՄՆ նախագահի ազգային անվտանգության հարցերով խորհրդական Ռոբերտ Օ’Բրայանը հեռախոսազրույց է ունեցել Հայաստանի վարչապետ Նիկոլ Փաշինյանի հետ, որի ընթացքում պաշտոնյան վերահաստատել է Ադրբեջանի և Հայաստանի կողմից հրադադարի ռեժիմի իրենց պարտավորություններին հավատարիմ մնալու անհրաժեշտությունը։ Այս մասին ասվում է ԱՄՆ Ազգային անվտանգության խորհրդի տարածած հաղորդագրության մեջ։
«Երկու երկրների ժողովուրդներն էլ շատ են տուժել. Հայաստանի ժողովուրդը, որը առերեսվում է հարձակողական ռազմական գործողությունների, այժմ կրում է կորուստների բեռը: Մեր աղոթքներն ենք հղում բազմաթիվ հայերի և ադրբեջանցիների, որոնք սպանվել կամ վիրավորվել են», - ասել է պաշտոնյան։
Օ’Բրայանը նշել է, որ այս հակամարտությունը ռազմական լուծում չունի. «Մենք կոչ ենք անում արտաքին բոլոր կողմերին զերծ մնալ միջամտությունից և միանալ ԱՄՆ-ին՝ Մինսկի խմբի համանախագահների միջնորդությամբ բանակցություններին վերադառնալու համար ճնշում գործադրելու հարցում», - ասել է ԱՄՆ նախագահի ազգային անվտանգության հարցերով խորհրդականը։
Աղբյուր՝ AntiFake.am