Հոկտեմբերի 24-ին ՀՀ ԱԺ «Իմ քայլը» խմբակցության պատգամավոր Աննա Կարապետյանը հարցազրույց է տվել «Առավոտ» լրատվականին, որում անդրադարձել է Հրայր Թովմասյանի դուստրերին ԱԱԾ հրավիրելու հանգամանքին և նշել. «Հիմա, երբ որ խոսում են ճնշումներից եւ այլն, ես ուզում եմ ուղղակի մի հարց տամ՝ այդ մարդիկ 2008-ին չէի՞ն տեսնում` ինչ է կատարվում»։
«Ես այնքան բանի միջով եմ անցել այդ ընթացքում: Իմ հորը 2008-ի Մարտի 1-ի դեպքերից հետո հիվանդանոցում՝ առանց բժշկի թույլտվության, առանց փաստաբանի, բարձր ճնշումով հարցաքննում էին: Դա իրենց կարելի էր: Ես այդ ամեն ինչը տեսել եմ, հիմա իմ համար ծիծաղելի է այս ամեն ինչը»,-հավելել էր Կարապետյանը։
Իմքայլական պատգամավորը ոչ միայն հիշողության, այլ նաև սկզբունքայնության լուրջ խնդիրներ ունի, ուստի հարկ ենք համարում հասարակությանը հիշեցնել Աննա Կարապետյանի անցած ճանապարհն ու նրա հայտարարություններն ընկալել այլ տեսանկյունից։
► Մարտի 1-ի գործով ազատազրկվածի դուստր իմքայլական պատգամավոր Աննա Կարապետյանը եղել է ՀՀԿ-ական պատգամավորի օգնական
Այսպես, Աննա Կարապետյանի հայրը՝ Սամվել Կարապետյանը, 2008 թ. նախագահական ընտրությունների ժամանակ եղել է Լևոն Տեր-Պետրոսյանի՝ թիվ 22/21 ընտրատարածքի վստահված անձ։ Նա մեղադրվել է ընտրությունների արդյունքների կեղծման մեջ՝ հօգուտ նախագահի թեկնածու Լևոն Տեր-Պետրոսյանի, և դատապարտվել 3 տարի ազատազրկման։
Փաստորեն, Աննա Կարապետյանը իր հոր հետ տեղի ունեցածի պատճառով, ինչպես ինքն է նշում, «անցել է այնքա՜ն բանի միջով», և դա վատ է, իսկ Հրայր Թովմասյանի պարագայում, երբ իրավապահ մարմինները ոչ միայն անձամբ Հրայր Թովմասյանին են ճնշման ենթարկում, այլ նաև վերջինիս սանիկներին, հարազատ քրոջը, թոշակառու հորը և երիտասարդ դուստրերին՝ անգամ կանչում ԱԱԾ, դա ոչ միայն ճնշում չէ, ըստ պատգամավորի, այլ ծիծաղելի է դա ճնշում համարելը։
Հատկանշական է, որ իմքայլական պատգամավորը 2015 թ. մինչև 2018 թ. եղել է ՀՀԿ խմբակցության պատգամավոր Հովհաննես Սահակյանի օգնականը։
ՀՀԿ-ական պատգամավորի օգնական աշխատած ժամանակահատվածում ՀՀ ԱԺ Պետաիրավական հարցերի մշտական հանձնաժողովը բազմաթիվ զեկույցներ է պատրաստել, քննարկումներ անցկացրել և անգամ ԵԽԽՎ զեկուցողներ ընդունել Մարտի 1-ի առնչությամբ, սակայն ոչ ոք չի հիշում, որ Աննա Կարապետյանն այդ ընթացքում հիշատակած լինի հորը, խոսացած լինի նրա նկատմամբ դրսևորված ճնշումների մասին և «բողոքի», որ ինքն էլ շատ բաների միջով է անցել։
Աննա Կարապետյանի մոտ, ինչպես իրենց քաղաքական առաջնորդի և բազմաթիվ իմքայլականների, գործում է վրեժխնդրության բնազդը՝ ուղեկցվելով «հիշողության կորստով» և անսկզբունքայնությամբ։ Վերջիններս քաղաքական ճնշումները ոչ միայն չեն բացառում, ավելին, եթե դրանք տեղի են ունենում իրենց իշխանության կողմից, ուրեմն դրանք իրավաչափ են և իրավական։
Աննա Կարապետյանը, ինչպես ներկայիս իշխանության բազմաթիվ այլ ներկայացուցիչներ, ՀՀԿ-ի իշխանության ժամանակահատվածում զբաղեցնելով տարբեր պաշտոններ, օգտվել է իշխանության «քաղցր պտուղներից»՝ մոռանալով իր «այնքա՜ն բանի միջով անցնելու մասին», իսկ այժմ, երբ իշխանական լծակները իրենց ձեռքերում են և վերջիններս քաղաքական ճնշումներ են օգտագործում իրենց քաղաքական շահերից ելնելով, սկսում են հիշել նախորդ իշխանությունների «հանցագործ» գործունեության մասին և իրենց դնել զոհի կարգավիճակում, իսկ իրենց կողմից իրականացվող ճնշումները համարում են «զուտ իրավական գործընթաց»։
Հեղինակ՝ Աստղիկ Մաթևոսյան