Նիկոլ Փաշինյանը վերջին մի քանի օրերին օրակարգ է բերում կեղծ պնդումներ, որով փորձում է հերթական անգամ պահել իր իշխանությունը: Այս մասին այսօր Ազատության հրապարակում Նիկոլ Փաշինյանի հրաժարականի պահանջով հրավիրված հանրահավաքին ասել է «Հայրենիք» կուսակցության նախագահ Արթուր Վանեցյանը:
«Նա ասում է հրապարակում հավաքված մարդիկ պայքարում են բացառապես իշխանության համար:
Ես պաշտոնապես հայտարարում եմ, որ մենք պայքարում ենք հանուն մեր հայրենիքի փրկության: Սա զուտ քաղաքական պայքար չէ՝ սա պայքար է մեր հայրենիքի համար»,- նշել է Վանեցյանը:
Արթուր Վանեցյանը ներկայացել է Նիկոլ Փաշինյանի երկու ստերը:
«Սուտ համար մեկ՝ արտաքին լսարանի համար: Ասում է` եթե հանկարծակի Հայաստանի քաղաքական ուժերը, հայ ժողովուրդը հասնեն իմ հրաժարականին, ապա այն հայտարարությունը, որ ստորագրվել է չեղարկվելու է, և պատերազմը վերսկսվելու է:
Ես պաշտոնապես հայտարարում եմ մենք պատերազմ վերսկսելու նպատակ չունենք: Մենք ասում ենք հետևյալը. պարտված առաջնորդը, այս ստորացուցիչ հայտարարությունը ստորագրած առաջնորդը չի կարող ներկայացնել հայերի շահերը այդ հայտարարության արդյունքում կնքվող պայմանագրում: Նա չի կարողանալու հայանպաստ որևէ կետ բերել և որևէ նորմալ լուծումներ գտնել: Մենք պատերազմ չենք ուզում, պատերազմը հրահրել է Նիկոլ Փաշինյանը՝ իր ապաշնորհ և ապիկար արտաքին քաղաքականությամբ»,- ասել է Վանեցյանը:
Արթուր Վանեցյանը նշել է, որ Նիկոլ Փաշինյանի երկրորդ սուտը ուղղված է ներքին լսարանին:
«Նիկոլ Փաշինյանը ասում է ժողովուրդ՝ ես, որ պարտվել եմ պատերազմը ,դա` հեչ, որ այսքան մարդ է զոհվել իմ անխելքության համար, դա էլ ոչինչ, բայց ժողովուրդ, եթե ես հանկարծակի գնամ, ինձ փոխարինելու են «նախկինները»: Դա կեղծ օրակարգ է, «նախկինին»վերադարձ չի լինելու: Ներկան մերժված է և մերժվելու է: Մենք գալիս ենք, մենք ապագան ենք՝ նոր դեմքերով, նոր մտքերով և նոր տեսլականով»,- նշել է Վանեցյանը:
Աղբյուր՝ AntiFake.am