Ինչպես ներկայացրել էինք նախորդ հրապարակմամբ, AntiFake.am-ը բազմաթիվ ահազանգեր էր ստացել այն մասին, որ պատերազմի ընթացքում վիրավորում ստացած և բուժման ուղարկված պայմանագրային զինծառայողների աշխատավարձը մասնակի է վճարվել:
Համապատասխան կառույցները մասնակի աշխատավարձ ստացած զինծառայողներին հայտնել էին, թե զինվորական հոսպիտալներում անցկացված մի քանի օրերը, օրինակ` 5 կամ 10 օրը, հաշվվել է որպես ոչ աշխատանքային օր, ուստի չկատարված աշխատանքի դիմաց չեն պատրաստվում վճարել:
Պատերազմի ընթացքում վիրավորում ստացած և բուժման ուղարկված զինծառայողների աշխատավարձի մասնակի վճարման կապակցությամբ պարզաբանումներ և պատասխաններ ստանալու նպատակով AntiFake.am-ը հարցում էր ուղարկել Պաշտպանության նախարարություն:
Համաձայն ՊՆ պարզաբանման՝ պատերազմի ընթացքում վիրավորում ստացած և բուժման մեջ գտնվող պայմանագրային զինծառայողները հանվում են զորամասի անձնակազմի ցուցակներից և թողնվում են կադրերի տրամադրության տակ` համաձայն ՀՀ պաշտպանության նախարարի համապատասխան հրամանի, որի հետևանքով էլ նրանց աշխատավարձը մասնակի է վճարվում:
Պետք է փաստել, որ մեր անվտանգության երաշխավորներն ու իրենց կյանքը հանուն մեզ վտանգողները պարգևատրումների և գովասանքի փոխարեն արժանանում են նման վերաբերմունքի: Այս գործելաոճը չի կարող մոտիվացնել իրենց ընտանիքը վարկերով ու տարատեսակ դժվարություններով պահող զինվորականներին շարունակել ծառայությունը Զինված ուժերում:
Հեղինակ՝ Մարի Ամիրջանյան
Աղբյուր՝ AntiFake.am