Այսօր՝ հունվարի 19-ին, իշխանական լրատվամիջոցներն ու պրոպագանդիստները տեսանյութեր ու տեղեկություններ են տարածում այն մասին, թե Վազգեն Մանուկյանն այս պահին այցելում է Սյունիք, սակայն սյունեցիները փակել են նրա ճանապարհը և չեն թողնում մտնել մարզ: Սակայն Հայրենիքի փրկության շարժումը հանդես է եկել հայտարարությամբ ու հերքել տարածվող լուրերը:
Սյունեցիների կողմից Վազգեն Մանուկյանի և 17 կուսակցությունների անդամների առջև ճանապարհը փակելու ստահոդ լուրերը տարածվել են իշխանական «araratnews.am»-ի, «epress.am»-ի ու պետական միջոցներից սնվող Հանրային հեռուստաընկերության «1lurer.am» լրատվական կայքի կողմից:
Այս ապատեղեկատվության տարածմանն են լծվել նաև «Հեղափոխության պահապաններ» խմբավորման անդամները:
Հայրենիքի փրկության շարժան հայտարարությունը՝ ստորև.
«Որոշ լրատվական կայքեր տեղեկություններ են տարածում, թե իբր Վազգեն Մանուկյանն այս պահին այցելում է Սյունիք, սակայն սյունեցիները փակել են նրա ճանապարհը և չեն թողնում մտնել մարզ:
Հայտնում ենք, որ դա ապատեղեկատվություն է:
Վազգեն Մանուկյանը և Հայրենիքի փրկության շարժումն այս պահին որևէ մարզային այցելություն չունեն:
Վազգեն Մանուկյանը գտնվում է Երևանում՝ իր գրասենյակում, և քիչ առաջ ավարտվել է նրա հանդիպումը մի խումբ տնտեսագետների հետ:
Նաև հայտնում ենք, որ Հայրենիքի փրկության շարժման կողմից առաջիկայում նախատեսված են մարզային այցելություններ, որոնց վերաբերյալ կտրվի տեղեկատվություն:
Լրատվամիջոցներին հորդորում ենք ապատեղեկատվություն չտարածել»:
Հեղինակ՝ Մարի Ամիրջանյան
Աղբյուր` AntiFake.am