Խնամի-ծանոթ-բարեկամով Հայաստանի էջը փակելու և քաղաքացիական Հայաստանի էջը բացելու խոստումներ տված իշխանականները շարունակում են մոռանալ իրենց խոսքերը:
Նախորդ հրապարակումներում AntiFake.am-ը բազմիցս ներկայացրել է 2019թ. և 2020թ. ընթացքում «խնամի-ծանոթ-բարեկամ» սկզբունքով պաշտոնավարումները:
2021թ. ընթացքում «խնամի-ծանոթ-բարեկամ» սկզբունքով արված նշանակումները կարծես թե նույնպես չեն վերջանում:
Ինչպես տեղեկանում ենք Կոտայքի մարզպետարանի պաշտոնական կայքէջից, իմքայլական պատգամավոր, ԵԿՄ նախագահ Սասուն Միքայելյանի դուստրը՝ Սաթենիկ Միքայելյանը, նշանակվել է Կոտայքի մարզպետի օգնականի պաշտոնում:
Մասնագիտությամբ բանասեր Սաթենիկ Միքայելյանի աշխատանքային կենսագրությունը սկսվել է 2018թ. «թավշյա հեղափոխությունից» հետո: Վերջինս նախ նշանակվել է Կոտայքի մարզպետի տեղակալի օգնականի, ապա՝ Կոտայքի մարզպետարանի քարտուղարության խորհրդականի պաշտոնում: Թե ինչպիսի գործունեություն է ծավալել Միքայելյանի դուստրը համալսարանն ավարտելուց հետո` 2011-2018թթ. ընթացքում, ներկայացված չէ:
Հիշեցնենք, որ Սասուն Միքայելյանի որդին՝ Սևակ Միքայելյանը, 2018թ.-ի հոկտեմբերի 27-ից հանդիսանում է Հրազդան համայնքի ղեկավարը:
Հաշվի առնելով այն հանգամանքը, որ 2021թ. ընթացքում «խնամի-ծանոթ-բարեկամ» սկզբունքով արված նշանակումները չեն սահմանափակվում ներկայացված դեպքով, կարող ենք փաստել, որ հրաժարական տալու փոխարեն` իշխող թիմի անդամները նոր թափ են հաղորդել «ԽԾԲ»-ական բարքերին:
«Խնամի-ծանոթ-բարեկամ» սկզբունքով պաշտոններ ստացածները ո՞րքան կշարունակեն պաշտոնավարել՝ ցույց կտա իշխող թիմի դեմ աշխատող ժամանակը:
Հեղինակ՝ Մարի Ամիրջանյան
► Խնամի-ծանոթ-բարեկամ ինստիտուտը Արարատի մարզպետարանում
► «Խնամի-ծանոթ-բարեկամ» սկզբունքով ինչ նշանակումներ են արվել 2020 թվականին
► Նիկոլ Փաշինյանը խնամի-ծանոթ-բարեկամ խմբապետական Հայաստանի նոր էջ է բացել
► Խնամի–ծանոթ–բարեկամ համակարգը «Նոր Հայաստանում»․ Փաշինյանի մտերիմները պաշտոնյաներ են դարձել (ՏԵՍԱՆՅՈՒԹ)
Աղբյուր` AntiFake.am