.png)
Այսօր` փետրվարի 13-ին, տեղական ժամանակով ժամը 15:29-ին (Գրինվիչի ժամանակով` ժամը 11:29-ին) ՀՀ ԱԻՆ Սեյսմիկ պաշտպանության տարածքային ծառայության սեյսմոլոգիական ցանցի կողմից գրանցվել է 4.7 մագնիտուդով երկրաշարժ Հայաստան` Երևան քաղաքից 8 կմ հարավ-արևելք (Նուբարաշեն վարչական շրջանից մոտ 2 կմ հյուսիս) օջախի 10 կմ խորությամբ: Էպիկենտրոնային գոտում ստորգետնյա ցնցման ուժգնությունը կազմել է 6-7 բալ:
Երկրաշարժը զգացվել է Երևան քաղաքում` 5-6 բալ ուժգնությամբ, Արարատի, Արմավիրի, Կոտայքի մարզերում՝ 4-5 բալ, իսկ Արագածոտնի, Շիրակի, Վայոց Ձորի, Գեղարքունիքի և Սյունիքի մարզերում` 3-4 բալ ուժգնությամբ։
ԱԻՆ-ի փոխանցմամբ` Ճգնաժամային կառավարման ազգային կենտրոն մոտ 3000 տարաբնույթ ահազանգ է ստացվել։ Փլուզումների վերաբերյալ ստացված ահազանգերից հաստատվել են դեռևս չորսը․ Երևանի Այվազովսկու փողոցում (մեկհարկանի շինության պատից՝ 9 քմ, տանիքից՝ 7 քմ փլուզում), Սմբատ Զորավարի փողոցում (շենքի պատից՝ 2 քմ փլուզում), Չեխովի փողոցում՝ (շենքի պատից՝ 1 քմ փլուզում) և Կոմիտասի պողոտայում (շենքի պատից պոկվել է մոտ 10 սալիկ):
Այս ընթացքում առողջապահության նախարարությունը հայտնել էր թեթև վնասվածքներ ստացած մեկ քաղաքացու մասին:
Այս փաստը, սակայն, արտակարգ իրավիճակների նախարարությունը ավելի ուշ հերքել է: «Հերքվել է նախնական տվյալների համաձայն Այվազովսկու փողոցում տուժած քաղաքացու առկայությունը»,- հայտնել է ԱԻՆ-ը:
Նշենք, որ ավելի վաղ հայտնած տեղեկատվությունը դեռ առկա է առողջապահության նախարարության էջում:
Վարչապետ Նիկոլ Փաշինյանը ևս տեղադրել է քաղաքացու վիրավորման մասին վերոնշյալ լուրը, այնուհետև խմբագրել այն:
Ավելին, Նիկոլ Փաշինյանը նշում է, որ երկրաշարժի էպիկենտրոնը գտնվում է Արմավիրի մարզում, սակայն ԱԻՆ-ը հաղորդում է, որ այն գտնվում է Նուբարաշեն վարչական շրջանից մոտ 2 կմ հյուսիս: Ստացվում է, որ Նիկոլ Փաշինյանը իր հսկայական հետևորդներ ունեցող էջով ապատեղեկատվություն է տարածում:
Նման պարագաներում բնակչությանը հավաստի տեղեկատվություն տալու փոխարեն պետական կառույցների կողմից նման իրարամերժ հայտարարությունների առկայությունը, այն դեպքում, երբ բնակչությունը հստակ տեեղեկատվության է սպասվում, դատապարտելի է:
Աղբյուր` AntiFake.am