Այսօր՝ փետրվարի 25-ին, վարչապետ Նիկոլ Փաշինյանը հեռախոսազրույց է ունեցել ՌԴ նախագահ Վլադիմիր Պուտինի հետ: Քննարկվել է երկրում ստեղծված իրավիճակը:
Հետաքրքիր է, որ հրապարակված մամուլի հաղորդագրություններում ներկայացվող բովանդակությունները տրամագծորեն հակասում են միմյանց: Ինչպես հաղորդում է ՌԴ նախագահի պաշտոնական կայքը, կողմերը «քննարկել են Հայաստանում ստեղծված իրավիճակը: Վլադիմիր Պուտինը խոսել է հօգուտ Հայաստանում կարգուկանոնի և հանդարտության պահպանման ու իրավիճակի՝ օրենքի սահմաններում կարգավորման: ՌԴ ղեկավարը կողմերին զսպվածության կոչ է արել»:
Հեռախոսազրույցի մասին լրիվ այլ հաղորդագրություն ենք կարդում ՀՀ վարչապետի պաշտոնական կայքում:
«Վարչապետ Նիկոլ Փաշինյանը հերթական հեռախոսազրույցն է ունեցել Ռուսաստանի Դաշնության նախագահ Վլադիմիր Պուտինի հետ: Երկու երկրների ղեկավարները քննարկել են Հայաստանում ստեղծված ներքաղաքական իրավիճակը: Նախագահ Պուտինն իր աջակցությունն է հայտնել Հայաստանի օրինական իշխանություններին և հույս հայտնել իրավիճակի շուտափույթ կարգավորման կապակցությամբ»:
ՀՀ վարչապետի կայքում առկա տեղեկատվությունը չի կարող հավաստի և ճշմարիտ լինել, քանի որ այն հակասում է ՌԴ նախագահի պաշտոնական կայքի հաղորդագրության բովանդակությանը, ինչպես նաև պետք է հաշվի առնել այն հանգամանքը, որ նման պրակտիկա միջազգային հարաբերություններում ընդունված չէ
Հաշվի առնելով Հայաստանում ստեղծված իրավիճակը և իշխանությունների դիրքորոշումը՝ նման գործելակերպը պետական կառույցի կողմից առավել քան անթույլատրելի է: Աչքի առաջ ունենալով նաև հայ-ռուսական հարաբերությունների «փայլուն» դրությունը, մասնավորապես՝ «Իսկանդերի» վերաբերյալ Նիկոլ Փաշինյանի կեղծ և ստահոդ հայտարարությունները՝ չի բացառվում, որ ռուսական կողմը նորից «հուժկու» տեղեկատվական հարված կհասցնի «Հայաստանի օրինական իշխանություններին»:
Աղբյուր՝ AntiFake.am