Աշխատանքի և սոցիալական հարցերի նախարարությունում պարգևատրումները կազմել են ավելի քան 237 մլն դրամ

article-image

Մենք շարունակում ենք ներկայացնել նախարարությունների կողմից մեզ տրամադրված պարգևավճարները։

Կառավարության անդամներից մեզ ուղարկված ամենամանրամասն պատասխան Աշխատանքի և սոցիալական հարցերի նախարարությանն է։

Պատասխանից պարզ է դառնում, որ նախարարության հայեցողական պաշտոններ զբաղեցնող աշխատակիցները 2019 թվականի ապրիլ-սեպտեմբեր ամիսներին ստացել են ընդհանուր առմամբ 7,981,923 դրամ: Նույն ժամանակահատվածում նախարարության քաղաքացիական ծառայության ղեկավար պաշտոններ զբաղեցնող քաղաքացիական ծառայողներին հատկացված պարգևավճարների չափը կազմում է 16,070,069 դրամ: Ընդ որում՝ եթե համեմատենք պաշտոնյաների աշխատավարձի և պարգևատրման չափերը, ապա պարզ կլինի, որ պարգևավճարները տրվել են տվյալ պաշտոնյայի աշխատավարձի մեկ ամսվա դրույքաչափի 80-100%-ի չափով: Քաղաքացիական ծառայության ղեկավար և մասնագիտական պաշտոններ զբաղեցնող քաղաքացիական ծառայողների ժամանակավոր թափուր պաշտոնները պայմանագրային հիմունքներով զբաղեցնող, ժամկետային աշխատանքային պայմանագրով, քաղաքացիական աշխատանք կատարող և տեխնիկական սպասարկում իրականացնող աշխատակիցներին 2019 թվականի ապրիլ-սեպտեմբեր ամիսներին տրված պարգևավճարների չափը կազմում է 173,016,264 դրամ:

Աշխատանքի և սոցիալական հարցերի նախարարությունում քաղաքական պաշտոններ զբաղեցնող անձանց 2019 թվականի մայիսից մինչև նոյեմբեր ամիսն ընկած ժամանակահատվածում տրված պարգևավճարների ընդհանուր չափը կազմում է 40,079,983 դրամ: Այդ պաշտոններն են` նախարարը, նախարարի առաջին տեղակալը և երկու տեղակալները. Զարուհի Բաթոյան, Գեմաֆին Գասպարյան, Արման Ուդումյան, Ժաննա Անդրեասյան, Սմբատ Սաիյան: Հարկ է նշել, որ ի տարբերություն նախարարության ավելի ստորին օղակներին տրվող պարգևավճարների չափի՝ նախարարության քաղաքական պաշտոններ զբաղեցնող անձանց տրված պարգևավճարը գերազանցում է վերջիններիս աշխատավարձի չափը:

Օրինակ, նախարար Զարուհի Բաթոյանի համար որպես աշխատավարձի, արձակուրդայինի և արձակուրդային լրացուցիչ վճարների չափ նշված է 793,680 դրամ: Տիկին Բաթոյանը, սակայն, սկսած մայիս ամսից՝ ամեն ամիս որպես պարգևատրում ստացել է 1,342,827/8 դրամ:  Զարուհի Բաթոյանի հետ միասին ավելի քան 1 միլիոն դրամ ստացել է նաև նախարարի առաջին տեղակալ Գեմաֆին Գասպարյանը: Գասպարյանի ստացած պարգևավճարի չափը տատանվում է ամսական 987,277 - 1,744,443 դրամի սահմաններում: Նախարարի տեղակալի ստացած պարգևավճարի չափը երբեմն նույնիսկ գերազանցել է Զարուհի Բաթոյանի ստացած պարգևավճարի չափին: Նախարարի մյուս երկու տեղակալների ստացած պարգևավճարների չափը տատանվել է 942,736 – 1.504.926 դրամի սահմաններում:

Նախարարությունում ընդհանուր առմամբ տրամադրվել է 237,148,239 դրամ պարգևավճար։

 

Հեղինակ՝ Մելինե Հայրապետյան

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Ստուգի՛ր փաստերը մեր միջոցով
Լրահոս
նիկոլ-օ-մետր

Նիկոլ-օ-մետրը գործիք է, որի միջոցով կարող եք իմանալ, թե որքանով է ՀՀ վարչապետ Նիկոլ Փաշինյանը կատարում իր խոստումները:

Ամենաընթերցվածը