AntiFake.am-ը հարցում էր ուղարկել Շրջակա միջավայրի նախարարությանը` հայցելով 2019 թվականի ընթացքում նախարարությանը հատկացված պարգևավճարների մասին տեղեկություններ:
Շրջակա միջավայրի նախարարությունը, պահպանելով օրենքով սահմանված ժամկետները և հիմք ընդունելով ՀՀ աշխատանքային օրենսգրքի 134-րդ հոդվածի, «Հանրային ծառայության մասին» ՀՀ օրենքի 41-րդ հոդվածի, ինչպես նաև «Անձնական տվյալների պաշտպանոթյան մասին» ՀՀ օրենքի 26-րդ հոդվածի դրույթները, ներկայացրել է 2019 թվականի հունվարից հոկտեմբեր ամիսներն ընկած ժամանակահատվածում նախարարության աշխատողների պարգևատրման վերաբերյալ տեղեկատվությունը:
Պարգևատրման աղբյուր են հանդիսացել «Քաղաքացիական, դատական և պետական այլ ծառայողների պարգևատրում» տնտեսագիտական դասակարգման հոդվածը և «Պարգևատրումներ, դրամական խրախուսումներ և հատուկ վճարներ» ծախսային հոդվածը:
Պարգևատրումները նախարարությունում կազմում են 181.313.200 դրամ: 2019 թվականի հունվարից հոկտեմբեր ընկած ժամանակահատվածում շրջակա միջավայրի նախարարը, նախարարի տեղակալները և գլխավոր քարտուղարը ընդհանուր առմամբ միասին ստացել են 27.367.500 դրամ պարգևավճար:
Չնայած այն հանգամանքին, որ հարցմամբ խնդրել էինք տրամադրել նաև միայն նախարար Էրիկ Գրիգորյանի ստացած պարգևավճարները, նախարարությունը չի տրամադրել հայցվող տեղեկատվությունը:
Հեղինակ՝ Մելինե Հայրապետյան