Նիկոլ Փաշինյանի իշխանության օրոք արտահերթ ընտրությունների անցկացումը նույնն է, որ լեգիտիմացնենք նրան՝ ևս 5 տարի դարձնելով ՀՀ վարչապետ: Այս մասին ընդդիմադիրների՝ Նիկոլ Փաշինյանի հրաժարականի պահանջով հանրահավաքի ընթացքում Tert.am-ի հետ զրույցում ասաց «Քաղաքացիական գիտակցություն» ՀԿ ղեկավար Նարեկ Սամսոնյանը:
«Ընտրությունների ժամանակ ավելի կոպիտ խախտումներ են լինելու, ավելի մեծ վարչական ռեսուրս է կիրառվելու: Արտահերթ ընտրությունները շատ կարևոր են, բայց դրանք կարող են լինել բացառապես Նիկոլ Փաշինյանի իշխանության հեռացումից հետո: Այդ դեպքում կլինեն մրցակցային պայմաններ: Այս պայմաններում ընտրությունների գնալը ընդդիմության կողմից ինքնասպանություն է, որովհետև վերջինս սատարելու է Նիկոլ Փաշինյանի իշխանության երկարացմանը»,-ասաց նա:
Ըստ Սամսոնյանի՝ կգտնվեն քաղաքացիներ, որոնք կատարվածից հետո ևս կքվեարկեն Փաշինյանի ու նրա թիմի օգտին, սակայն այդ քաղաքացիներն ադրբեջանասերներն են: «Ընտրությունները համատարած չկեղծելու համար Նիկոլ Փաշինյանը չպետք է լինի իշխանության»,-նշեց նա:
Վերջինիս խոսքով՝ երեք տարի երկրում անկանախատեսելիություն է, ապագայի նկատմամբ զրո հավատ է, ինչի դեմ այժմ պետք է պայքարել:
«Երկրում հանրային համերաշխությունը կվերականգնվի այն ժամանակ, երբ կլինեն բոլոր հարցերի պատասխանները, հանցագործություն կատարած բոլոր մարդիկ կպատժվեն: Հանրային համերաշխության մթնոլորտը խաթարվել է 3 տարի առաջ՝ իշխանության զավթմամբ: Այս իշխանությունը մինչև չհեռանա, հանրային համերաշխության մասին չի կարելի խոսել»,-ասաց Նարեկ Սամսոնյանը:
Աղբյուր՝ Tert.am